Daxili siyasət

Daxili siyasət

İnzibati Xətalar Məcəlləsinə və Cinayət Məcəlləsinə dini fəaliyyətlə bağlı dəyişikliklər edilib

15 noyabr 2011 14:28 (UTC +04:00)

APA-nın xəbərinə görə, layihə barədə parlamentin Hüquq siyasəti və dövlət quruculuğu komitəsinin sədri Əli Hüseynli məlumat verərək dəyişikliyin texniki xarakterli olduğunu bildirib. Dəyişiklik səsə qoyularaq qəbul olunub.

Daha sonra İnzibati Xətalar Məcəlləsinə və Cinayət Məcəlləsinə dəyişikliklər edilməsi haqqında qanun layihələri müzakirə olunub və səsə qoyularaq qəbul edilib. Dəyişikliklər dini fəaliyyətlə bağlıdır. Çıxış edən deputatların əksəriyyəti dəyişiklikləri dəstəkləyib, yalnız Fazil Mustafa əleyhinə çıxıb. Çingiz Qənizadə İranın Azərbaycanda din pərdəsi altında təbliğat apardığını söyləyib.

İnzibati Xətalar Məcəlləsinin 300-cü maddəsinə edilmiş dəyişikliklə dini etiqad haqqında qanunvericiliyə zidd hesab olunan fəaliyyətlər müəyyənləşdirilib. Belə ki, dəyişikliyə əsasən müvafiq icra hakimiyyəti orqanı ilə razılaşdırılmadan vətəndaşların dini təhsil müəssisələrində təhsil almaq üçün xaricə göndərilməsi, din xadimlərinin mübadiləsi, islam dininə aid ayin və mərasimlərin Azərbaycandan kənarda dini təhsil almış vətəndaşlar tərəfindən keçirilməsi, qanunla müəyyən olunmuş qaydada satışına icazə verilən dini təyinatlı ədəbiyyatın, əşyaların və dini məzmunlu başqa məlumat materiallarının müvafiq icra hakimiyyəti orqanının razılığı ilə yaradılan ixtisaslaşdırılmış satış məntəqələrindən kənarda satılması, əcnəbilər və vətəndaşlığı olmayan şəxslər tərəfindən dini təbliğatın aparılması dini qanunvericiliyin pozulması sayılacaq.

Əcnəbilər və vətəndaşlığı olmayan şəxslər tərəfindən dini təbliğatın aparılması qanunsuz olaraq dini təyinatlı ədəbiyyatı, əşyaları və dini məzmunlu başqa məlumat materiallarını yaymaqla (satılmaqla) törədildikdə Cinayət Məcəlləsinin müvafiq maddəsinə əsasən cinayət məsuliyyətinə səbəb olacaq.

milli_məclis