Daxili siyasət

Ana səhifə

Daxili siyasət

SAM-ın yaranmasından 4 il ötüb

16 noyabr 2011 07:39 (UTC +04:00)

Bakı – APA. 2007-ci il noyabrın 12-də Azərbaycan prezidentinin fərmanı ilə əsası qoyulmuş Strateji Araşdırmalar Mərkəzinin yaranmasından 4 il ötüb. SAM-dan APA-ya verilən məlumata görə, qurum dövlətin birbaşa dəstəyi və savadlı kadr potensialının səyi nəticəsində Azərbaycanın ən güclü beyin mərkəzinə çevrilə bilib.

Bu illər ərzində SAM tərəfindən 32 elmi tədqiqat işi həyata keçirilib, 14 beynəlxalq konfrans, 100-ə yaxın dəyirmi masa təşkil edilib. Mərkəzin ekspertləri xaricdə keçirilmiş 100-ə yaxın beynəlxalq tədbirə qatılıblar.

Elmi tədqiqatlar sırasında Azərbaycanın daxili və xarici siyasəti - Dağlıq Qarabağ münaqişəsi, Azərbaycanın enerji strategiyası, ölkənin siyasi-iqtisadi inkişafı, milli təhlükəsizlik məsələləri əsas yer tutub.

Strateji Araşdırmalar Mərkəzi elmi-analitik tədqiqat fəaliyyətini rus, Azərbaycan və ingilis dillərində daimi dərc olunan məcmuələr, dərgilər, məqalələr formasında ictimaiyyətin diqqətinə çatdırır. Belə ki, “Azerbaijan Focus”, “Strateji təhlil”, “Analitik Baxış”, “SAM-ın İcmalı”, “SAM-ın Şərhləri”, “Caucasus İnternational” kimi məcmuələrdə mərkəzin ekspertləri ilə yanaşı, yerli və xarici tədqiqatçıların elmi işləri, siyasi təhlilləri və proqnozları yer alır.

SAM-ın təşəbbüsü və dəstəyi ilə ölkədə və xaricdə 10-a yaxın kitab işıq üzü görüb, 5-i isə nəşrə hazırlanır. “Azərbaycanda siyasi partiyalar”, “Cənubi Qafqaz: Ərazi bütövlüyü, geosiyasi mübarizələr və enerji”, “Dağlıq Qarabağ münaqişəsi, ədalətli sülh, yoxsa qaçılmaz müharibə: tarixi, geosiyasi və hüquqi baxış”, “Millətlərin ağır sınaqları: Qafqazın Geosiyasəti”, “Rusiya-Azərbaycan münasibətləri 20 il ərzində: tarix və perspektivlər” və digər nəşrlər buraya daxildir.

Qeyd olunan dövrdə SAM tərəfindən beynəlxalq və ölkə miqyasında tədbirlər keçirilib. Onların sırasında “Cənubi Qafqazda təhlükəsizliyə maneələr”, “Azərbaycan və Şərq tərəfdaşlığı”, “Kiber və milli təhlükəsizlik”, “İqlim dəyişikliyi və Geniş Qara dəniz regionunda bərpa olunan enerji mənbələri” kimi mühüm tədbirlər dünya ekspertləri tərəfindən maraqla qarşılanıb.

2012-ci ilin martında Bakıda SAM-ın Türk-Asiya Strateji Araşdırmalar Mərkəzi ilə birgə əməkdaşlığı nəticəsində keçiriləcək “İslam Əməkdaşlıq Təşkilatına üzv ölkələrin beyin mərkəzlərinin 3-cü forumu” da qlobal və regional siyasi proseslərin ictimai müzakirəsi üçün mühüm tədbirlər sırasına daxil olacaq.

Dünyanın bir sıra tanınmış siyasətçiləri və ekspertləri - ABŞ dövlət katibinin Avrasiya enerji məsələləri üzrə xüsusi nümayəndəsi, səfir Riçard Morninqstar, ABŞ-ın "Stratfor" analitik korporasiyasının prezidenti Corc Fridman, “The Kohen Group” təşkilatının vitse-prezidenti Mark Qrosman, “Heritage Foundation”ın aparıcı eksperti Ariel Koen, Avropa Siyasəti Mərkəzinin eksperti Amanda Pol, “Rusiya Qlobal Siyasətdə” jurnalının baş redaktoru F. Lukyanov və digərləri SAM-ın dəvəti ilə Azərbaycana gələrək mərkəzin təşkil etdiyi tədbirlərdə əsas məruzəçi qismində iştirak ediblər, ölkənin hökumət qurumlarının rəhbərləri və ekspertləri ilə görüşlər keçiriblər.

Beynəlxalq əlaqələrə gəlincə, təkcə bu il ərzində Türkiyə, Rusiya və İtaliyanın qabaqcıl beyin mərkəzləri ilə əməkdaşlığa dair memorandum imzalanıb, gələcəkdə də Argentina, Yunanıstan, və Polşanın bir sıra siyasi elmi institutları ilə əməkdaşlığın rəsmiləşdirilməsi nəzərdə tutulub.

Bundan başqa, SAM-ın həyata keçirdiyi “Qonaq Elmi İşçilərinin Mübadiləsi Proqramı” çərçivəsində bugünədək Kolumbiya, Sorbon, Helsinki universitetləri, “Stratfor”, Rusiya Strateji Araşdırmalar İnstitutu, Moskva Karnegi Mərkəzi və s. elmi tədqiqat institutlarının siyasi tədqiqatçılarına Azərbaycanda araşdırmalar aparmaq imkanı yaradılıb. SAM-da çalışan azərbaycanlı ekspertlər də mütəmadi olaraq həmin beyin mərkəzlərində qonaq olaraq tədqiqatlar aparırlar.

Hazırda mərkəz müasir dünyanın aktual və mühüm problemlərini araşdıraraq təhlil sahəsini genişləndirməyi planlaşdırır. Gələcək fəaliyyətin prioritet istiqaməti isə Ermənistanla informasiya müharibəsində “hücum” mövqeyi tutmaq, Azərbaycanın əldə etdiyi uğurlar barədə dünya ictimaiyyətinə həqiqətləri çatdırmaqdır.