Daxili siyasət

Ana səhifə

Daxili siyasət

Prezident İlham Əliyev: “Regionların sosial-iqtisadi inkişafı Dövlət Proqramının icrası nəticəsində böyük işlər görülüb”

18 noyabr 2011 03:16 (UTC +04:00)

APA-nın verdiyi xəbərə görə, bu barədə Azərbaycan prezidenti İlham Əliyev Şəkiyə səfəri çərçivəsində mərkəzi xəstəxananın açılışındakı çıxışında deyib.
Dövlət başçısı xəstəxananın ən muasir standartlara cavab verdiyini vurğulayaraq deyib ki, qəbul edilmiş qərarlar vaxtında və keyfiyyətlə icra edilir və xüsusilə sosial sahədə belə gözəl obyektlərin yaradılması çox böyük və əlamətdar hadisədir.
Onun sözlərinə görə, bütövlükdə Azərbaycanda indi bütün bölgələrdə yeni xəstəxanalar açılır. “Demək olar ki, mən hər ay yeni xəstəxananın açılışında iştirak edirəm, bəzi hallarda ayda iki dəfə. Bu, onu göstərir ki, bu proses bu gün bölgədə geniş vüsət alıb. Bütün bu zonada demək olar ki, müasir xəstəxanalar tikilib, tibbi mərkəzlər yaradılıb. Şəkidə yaradılan bu mərkəz əlbəttə ki, ən müasir mərkəzdir. Bakıda bu sahədə işlər görülür, yeni xəstəxanalar tikilir, təmir edilir. Ağdaşda, Ucarda, Xaçmazda buna bənzər gözəl xəstəxana tikilib və bu yaxınlarda istifadəyə verilib. Mən təkcə son bir ayın hadisələrini yada salıram”.
Bu xəstəxananın tikintisində işləri Səhiyyə Nazirliyi Dünya Bankı ilə birlikdə gördüyünü deyən president bildirb: “Mən çox şadam ki, Dünya Bankı Azərbaycanın sosial sahəsinə də diqqət göstərir. Dünya Bankı ilə əməkdaşlığımız böyük tarixə malikdir. Azərbaycanda bir sıra infrastruktur layihələrinin icrası ilə bağlı birgə fəaliyyət göstərmişik. Bütövlükdə beynəlxalq maliyyə qurumları Azərbaycanda iqtisadi və sosial sahələrdə gedən proseslərə çox müsbət qiymət verirlər”.
Dövlət başçısı deyib ki, regionların inkişafı Proqramının icrası ilə bağlı əvvəlki dövrdə başlanılan işlər bu gün artıq reallaşır və özünü büruzə verir. Regionlarda bütövlükdə işlər yaxşı gedir. O Qobustan rayonundan tutmuş Balakənə qədər gözəl müasir turizm zonası kimi özünü göstərəcəyinə dair əminliyini bildirb. “Bunu etmək üçün indi bütün infrastruktur layihələri icra edilir, yollar çəkilir. Şəki-Qax avtomobil yolu çəkilir. Yəqin ki, yaxın zamanlarda açılacaq. Bu, məsafəni daha da qısaldacaq. İnfrastruktur layihələri icra edilir, yeni binalar, qazlaşdırma, suvarma, içməli su layihəsi, o cümlədən Şəki şəhərinin içməli su problemlərinin həlli üçün layihə icra edilir. Onun birinci mərhələsi başa çatıb. Yaxın zamanlarda Şəkinin bütün su və kanalizasiya problemləri öz həllini tapmalıdır”.
Prezident deyib ki, qazlaşdırma ilə bağlı işlər daha da sürətlə gedir. O xatırladıb ki, Şəkinin inkişafı ilə bağlı xüsusi Sərəncam verilib. Bu Sərəncamın çox böyük mənası var. Təkcə ona görə yox ki, bu Sərəncam əsasında Şəkinin abadlaşmasına və tarixi binaların bərpasına beş milyon manat vəsait ayrılıb. “Əvvəlki dövrdə də vəsait ayrılmışdır, bundan sonra da ayrılacaqdır. Bu Sərəncamın əsas mahiyyəti ondan ibarətdir ki, biz öz tarixi keçmişimizə, tarixi şəhərlərimizə daha da böyük diqqətlə yanaşmalıyıq. Bu, həm gələcəyə yönəlmiş bir addımdır, gələcək fəaliyyətimiz üçün bir istiqamətdir, eyni zamanda, keçmişimizə də olan münasibətdir”.
Prezident deyib ki, Azərbaycanın tarixi şəhərlərinin abadlaşması və mədəni irsimizin qorunması üçün əlavə sərəncamlar veriləcək və digər şəhərlər də bu proqramla əhatə olunacaq.
İlham Əliyev qeyd edib ki, Şəki indi yeni inkişaf mərhələsindədir. Bütün dövrlərdə bu şəhər Azərbaycan tarixində xüsusi yerə malik olub. İndi bölgələrin inkişafı ilə bağlı konkret proqramlar icra olunur və ətraf rayonlar da sürətlə inkişaf edir. 2013-cü ilin sonuna qədər qazlaşdırma, elektrik enerjisi, içməli su, kanalizasiya, yollar - bütün bu məsələlər öz həllini yüksək səviyyədə tapacaq. İçməli su layihəsi əhalinin artımı nəzərə alınmaqla 2035-ci ilə qədər hesablanıb. Ona görə bu məsələ ilə bağlı heç bir problem olmayacaq.
Tarixi binaların bərpası və qorunması üçün vəsait ayrılıb. “Bu da Şəki üçün çox vacib istiqamətdir. Çünki burada kifayət qədər tarixi abidələr vardır. Şəkini müasir beynəlxalq turizm mərkəzinə çevirmək üçün konkret tapşırıqlar verilmişdir. Onsuz da turistlər həm ölkə daxilindən, həm xaricdən gəlirlər və gələcəklər bu tarixi, bu gözəlliyi görmək üçün. Ancaq biz daha da yaxşı şərait yaratmalıyıq. Müasir otellər, turizm kompleksləri, əyləncə yerləri, istirahət parkları, bütün bunlar da yaradılmalıdır. Bu gün vaxtı ilə tikilmiş və indi yenidən qurulmuş Olimpiya İdman Kompleksinin açılışını qeyd etmişik. Bu da bir növ turizm mərkəzidir”.
Prezident vurğulayıb ki, Şəki daha da gözəl, daha da cazibədar olmaqla yanaşı, öz tarixi simasını saxlamaladır. Dövlət başçısının sözlərinə görə, Şəkinin gələcək inkişafı ilə bağlı konkret proqramlar var. Bu proqramlar əvvəlki dövrdə də olub. Regionların sosial-iqtisadi inkişafı Dövlət Proqramının icrası nəticəsində böyük işlər görülüb. Növbəti mərhələ daha da ciddi, təsirli olmalıdır. Nəticələr də daha da gözəl olmalıdır.