Daxili siyasət

Ana səhifə

Daxili siyasət

Deputat Astan Şahverdiyev həmkarı Etibar Hüseynova sərt cavab verib

23 noyabr 2011 14:36 (UTC +04:00)

Bakı. Rəşad Süleymanov - APA. Milli Məclisin Cəbrayıl rayonundan olan deputatı Astan Şahverdiyev deputat Etibar Hüseynovun qaçqın və məcburi köçkünlərlə bağlı səsləndirdiyi ifadələrə sərt reaksiya verib. APA-nın məlumatına görə, deputat çıxışında E. Hüseynovu əsassız, deputat adına yaraşmayan çıxış etməkdə ittiham edib.

«Biz Cəbrayıl, Zəngilan, Qubadlı rayonundan olan məcburi köçkünlər Araz çayını keçib, çətin şəraitdə gəlmişik. Cavan oğlan deyə bilərmi ki, o bu sözləri deyərkən nəyə əsaslanır, kimi nəzərdə tutur? Ona tövsiyə edərdim ki, getsin cəbhə xəttinə. Füzuli rayonunun Alxanlı kəndi erməni mövqelərindən 500 metr məsafədədir. Görsün orada insanlar hansı şəraitdə yaşayırlar. Hesab edirəm ki, bu deputata səs verən seçicilər onun bugünkü sözlərini eşidəndən sonra xəcalət çəkəcəklər».

A. Şahverdiyev bildirib ki, E. Hüseynovun çıxışına etiraz olaraq məcburi köçkün rayonlarından olan bir qrup vətəndaş parlamentin qarşısında aksiya keçirmək istəyib: “Lakin buna imkan vermədik. Mən başa düşə bilmirəm. İnsanlar 100 illər ərzində yığdıqları var-dövləti qoyub gəlib Biləsuvarda niyə məskunlaşmalıdırlar ki? Bura Mili Məclisdir, şou məclisi, millət vəkilləri də şoumen deyillər».

A. Şahverdiyevin iradlarına spiker Oqtay Əsədov münasibət bildirib: «Etibar cavan deputatdır. Hələ ki, danışığında müəyyən məsələlərə diqqət eləmir. Məncə artıq hər kəs öz işini bildi ».

Qeyd edək ki, Etibar Hüseynov bu gün parlamentdəki çıxışında qaçqın və məcburi köçkünlərin ünvanına bəzi iradlar səsləndirib. Deputat deyib ki, onların bəziləri Bakıya qaçıb gəldikdən sonra villalara sahib olublar, lakin qaz və elektrik haqlarını ödəmirlər.