Daxili siyasət

Daxili siyasət

Azərbaycan Prezident Administrasiyası: Ermənilər qədim və müasir tarixi bütün dünyanın gözü qarşısında saxtalaşdırırlar

01 dekabr 2011 08:12 (UTC +04:00)

Bakı. Rəşad Süleymanov – APA. “Ermənilər tərəfindən qədim tarixin, eyni zamanda müasir tarixin saxtalaşdırılması bütün dünyanın gözü qarşısında baş verir. Ermənistan tarixçilərinin özlərindən miflər uyduraraq, sonra bu miflər üzərində öz tarixlərini qurmaları bir yana, onlar bütün dünyada elmi aldatmaqla məşğuldurlar”.

APA-nın xəbərinə görə, bunu Prezident Administrasiyası ictimai-siyasi şöbəsinin müdiri Əli Həsənov “Qafqaz Albaniyasının Azərbaycanın və Qafqazın tarixində rolu” mövzusunda keçirilən beynəlxalq elmi konfransda çıxışında deyib.

Ə. Həsənov bildirib ki, ermənilər dünyanın ayrı-ayrı siyasi ensiklopediyalarına saxta məlumatlar yerləşdirməklə, Cənubi Qafqazın tarixini saxtalaşdırırlar: “Cənubi Qafqazın etnik strukturunu, xalqların qədimdən bu günə kimi mədəniyyətini, məişətini, yaxşı nə varsa, ermənilərin adına yazıb, onları erməniləşdirməyə çalışır, digər xalqları köçəri, mədəniyyətdən uzaq kimi qələmə verirlər. Biz Cənubi Qafqazda bundan sonrakı inkişaf haqda düşünməliyik. Cənubi Qafqazda heç bir xalq buranı tərk etməyəcək, kimsə buranı kiməsə qoyub getməyəcək. Biz gələcəyə baxıb, tariximizi qurmalıyıq. Kim burada necə yaşayıb, buraya necə gəlib, necə gedib, bunu bilməliyik. Lakin gələcək tarixi keçmişin üzərində qurmaq olmaz”.

PA şöbə müdiri onu da qeyd edib ki, hər bir xalq xoşbəxtliyini BMT çərçivəsində tanınan ərazilər üzərində təmin etməlidir: “Bölgədəki hər bir xalq başqa xalqın sərvətlərindən, resurslarından sivil normalar və beynəlxalq hüquqa uyğun yararlanmalıdır. Yoxsa kiminsə kiməsə ərazi iddiası irəli sürməsi, təbii resurslarına göz dikməsi, onu ələ keçirmək cəhdləri adekvat münasibət və qarşı tərəfin müqavimətini yaradacaq. Bunun da nəyə gətirib çıxaracağını hamı yaxşı bilir”.

Əli_Həsənov