Daxili siyasət

Ana səhifə

Daxili siyasət

Bakıda Azərbaycanın dövlət müstəqilliyinin 20 illiyinə həsr olunmuş beynəlxalq konfrans keçirilir – YENİLƏNİB - FOTOSESSİYA

Bakıda Azərbaycanın dövlət müstəqilliyinin 20 illiyinə həsr olunmuş beynəlxalq konfrans keçirilir – <font color=red>YENİLƏNİB - FOTOSESSİYA</font>

07 dekabr 2011 08:17 (UTC +04:00)

Bakı. Rəşad Süleymanov-APA. Bakıda Azərbaycan Prezidenti yanında Strateji Araşdırmalar Mərkəzi və BMT İnkişaf Proqramının birgə təşkilatçılığı ilə “Müstəqilliyin 20 illiyi: mütərəqqi, ədalətli və dinamik dövlət quruculuğuna gedən yolda əldə olunmuş nailiyyətlər və qarşıya çıxan çətinliklər” mövzusunda konfrans keçirilir. APA-nın məlumatına görə, tədbirdə millət vəkilləri, hökumət rəsmiləri, diplomatlar, media qurumlarının təmsilçiləri iştirak edirlər.

Konfransda çıxış edən Azərbaycan Prezident Administrasiyasının rəhbəri Ramiz Mehdiyev bildirib ki, 20 il dövlətin yaranması və inkişafı baxımından çox kiçik dövrdür: “Azərbaycan dövlət müstəqilliyini əldə etdikdən sonra ölkədə islahatlar aparılıb, böyük işlər görülüb. Bu gün Azərbaycanın yeni inkişaf strategiyasını hazırlayırıq. Artıq inkişaf strategiyasının mahiyyətcə yeni mərhələsindəyik. Tarixən geostrateji maraqların kəsişdiyi məkanda yerləşən Azərbaycan öz müstəqilliyi üçün daim mübarizə aparıb. Müstəqilliyin ilk illərində üzləşdiyi müharibə, siyasi hərc-mərclik, torpaqlarımızın işğalı ölkənin gələcəyini sual altında qoymuşdu. Ümummilli lider Heydər Əliyevin hakimiyyətə gəlməsi ilə Azərbaycan bu problemlərdən xilas oldu”.

Ramiz Mehdiyev bu müddət ərzində Azərbaycanın qüdrətinin dəfələrlə artdığını vurğulayıb: “”Bu gün Azərbaycan iqtisadiyyatı Cənubi Qafqaz iqtisadiyyatının 80 faizdən çoxunu təşkil edir. Qara qızılın ağ qızıla çevrilməsi strategiyası ölkəmizin inkişafının əsasıdır. Biz çox gözəl bilirik ki insan amilinə dövlət qayğısı ölkənin gələcək inkişafı və təhlükəsizliyidir. Dövlət əlindəki vasitələrlə iqtisadi fəaliyyətdə artıma şərait yaradır. Əhalinin həyat səviyyəsinin yaxşılaşdırılması, vətəndaşların işlə təmin edilməsi dövlətin əsas prioritetləridir. 1993-cü ildən başlayaraq ölkədə iqtisadi və siyasi islahatlar paralel şəkildə aparılır. Azərbaycan 2001-ci ildən Avropa Şurasına daxil olmaqla Avropa demokratiya ailəsinin fəal üzvünə çevrilib”.

Prezident Administrasiyasının rəhbəri çıxışında Dağlıq Qarabağ münaqişəsinə də toxunub: “Bizim qarşımızda əsas çətinlik Ermənistanın hərbi təcavüzüdür. Necə ola bilər ki beynəlxalq birliyin üzvü olan bir dövlət başqa bir dövlətin ərazi bütövlüyünü pozur və 19 ildir digər dövlətin ərazilərini işğal altında saxlayır? Bu, BMT-nin qərarları ilə ziddiyyət təşkil edir. Belə vəziyyətə baxmayaraq biz beynəlxalq birliyin susqunluğun müşahidə edirik. Minsk Qrupunun fəaliyyətini qənaətbəxş hesab etmək olmaz. Bu dövlətlər Ermənistanın işğal siyasətinə son qoymaq üçün əllərini ağdan qaraya vurmayıblar. Ermənistan və ermənilər pərdə arxasında ciddi müdafiə olunur”.

Ramiz Mehdiyev bildirib ki, Dağlıq Qarabağda doğulmuş və yaşayan ermənilər Azərbaycanın Avropa Şurası və BMT qarşısındakı öhdəliklərinə uyğun olaraq, Azərbaycan Konstitusiyasının verdiyi hüquqlardan istifadə edə bilərlər: “Ermənistanın işğalçılıq siyasəti onu regional layihələrdən kənarda qoyub, ölkə iqtisadiyyatı pis vəziyyətə düşüb, insanlar köçüb gedirlər. Azərbaycan isə 1994-cü ildən güclənir”.

PA rəhbərinin sözlərinə görə, regionda həyata keçirilən iqtisadi layihələr regional əməkdaşlığa təkan verir: “Azərbaycan regional əməkdaşlığın aparıcı qüvvəsinə çevrilib. Bu güclü iqtisadiyyatın və mili birliyin bariz nümunəsidir”.

Tədbirdə çıxış edən BMT İnkişaf Proqramının Azərbaycandakı rezident əlaqələndiricisi Fikrət Akçura ölkəmizin BMT Təhlükəsizlik Şurasının qeyri-daimi üzvü seçilməsini böyük uğur kimi dəyərləndirib: “Bakı-Tiflis-Ceyhan neft kəməri layihəsinin uğurla həyata keçirilməsi ilə Azərbaycanın orta insani inkişaf kateqoriyasından yüksək kateqoriyaya keçib. Keçmiş sovet respublikalarından yalnız Azərbaycan bu yüksək inkişafa nail olub.
Azərbaycan bir çox nailiyyətlər əldə edib. Qadınların işlə təmin olunması heç bir zaman problem olmayıb. Mili Məclisdə qadın deputatların sayı 16 faizə çatıb. İyirmi il ərzində Dağlıq Qarabağ münaqişəsinin həllini tapmaması problem olaraq qalır”.

Fikrət Akçura ötən illər ərzində Dağlıq Qarabağ münaqişəsinin nizamlanması prosesində irəliləyiş əldə olunmamasından təəssüfləndiyini qeyd edib: “Münaqişənin nizamlanması üçün keçirilən çoxsaylı görüşlərə baxmayaraq heç bir dəyişiklik baş verməyib. Beynəlxalq ictimaiyyət münaqişənin nizamlanması üçün çox az iş görüb”.

Tədbirdə çıxış edən iqtisadi inkişaf naziri Şahin Mustafayev qeyd edib ki, 2015-ci ilədək yoxsulluq səviyyəsinin 2 dəfə azaldılması nəzərdə tutulur. Ş. Mustafayev müstəqillik dövründə iqtisadiyyatda əldə olunmuş nailiyyətlər barədə də məlumat verib.

Konfrans işini davam etdirir.