Daxili siyasət

Daxili siyasət

Vəkillər Kollegiyasının sədri Əvəz Temirxanın bu quruma üzv ola bilməməsi məsələsinə aydınlıq gətirib

10 dekabr 2011 14:59 (UTC +04:00)

Bakı. Pərvin Abbasov – APA. “Əvəz Temirxanın Vəkillər Kollegiyasına qəbul olunması məsələsində müsbət rəy almaması ilə bağlı bizə heç bir iradı olmayıb”. Bunu APA-ya açıqlamasında Azərbaycan Vəkillər Kollegiyasının sədri Azər Tağıyev deyib.

O bildirib ki, Ə.Temirxan şifahi imtahanda müsbət rəy ala bilmədiyindən, Kollegiyaya üzv ola bilməyib: “İxtisas Komissiyasının üzvləri alimlər, hakimlər və vəkillərdir. Biz Əvəz Temirxana qarşı heç bir qərəz hiss etməmişik. Onun özünə qarşı qərəz edildiyi barədə düşünməsinin səbəbi mənə aydın deyil. Amma deməliyəm ki, müsahibə prosesini Avropa Şurası, Amerika Hüquqşünaslar İttifaqı və digər qurumların nümayəndələri müşahidə edib. Yəni ortada qərəz ola bilməz. Sadəcə, ona verilən sualların cavabları Komissiyanı qane etməyib”.

Qeyd edək ki, Azərbaycan Liberal Partiyasının (ALP) sədri, hüquqşünas Əvəz Temirxan Vəkillər Kollegiyasının üzvlüyünə qəbul edilməyib. ALP-nin yaydığı açıqlamada bildirilir ki, o, əvvəlki mərhələləri uğurla keçsə də, dekabrın 8-də Vəkillər Kollegiyasının İxtisas Komissiyasının keçirdiyi müsahibə zamanı Vəkillər Kollegiyası üzvlüyünə qəbul olunmasına müsbət rəy verilməyib. Azərbaycan Liberal Partiyası hesab edir ki, Ə.Temirxanın Vəkillər Kollegiyasını üzvlüyünə qəbul olunmaması onun müxalifətçi siyasi fəaliyyəti ilə bağlıdır. Partiya Ə.Temirxanın hüquqlarının bərpa olunmasını tələb edir.