Daxili siyasət

Ana səhifə

Daxili siyasət

“Səriştəlilik, Müstəqillik, Qərəzsizlik, Şəffaflıq, Səmərəlilik – müasir dövrün tələbləri prizmasından Azərbaycanda məhkəmə-hüquq islahatları” mövzusunda beynəlxalq konfrans keçirilib - FOTO

14 dekabr 2011 08:56 (UTC +04:00)

APA-nın məlumatına görə, Məhkəmə-Hüquq Şurası, Ali Məhkəmə, Azərbaycan Hüquq İslahatları Mərkəzinin (AHİM) və Almaniya Beynəlxalq Əməkdaşlıq Təşkilatının (GİZ) birgə təşkilatçılığı ilə keçirilən konfransda Azərbaycanda aparılan məhkəmə-hüquq islahatları, BMT tərəfindən qəbul edilən “Hakimlərin davranışı üzrə Banqalor Prinsipləri”nin hüquq ictimaiyyətinə tanıdılması, ölkədə hakimlərin davranış qaydalarını tənzimləyən cari kodeksin adı çəkilən prinsiplər prizmasından təkmilləşdirilməsi perspektivlərinin müəyyən edilməsi və bu sahədə milli və beynəlxalq təcrübənin bölüşdürülməsi ilə bağlı məsələlər müzakirə mövzusu olub.

Tədbiri giriş sözü ilə açan Ali Məhkəmənin sədri Ramiz Rzayev Azərbaycanda bu istiqamətdə aparılan islahatlar haqqında məlumat verməklə yanaşı, qarşıda duran məqsəd və vəzifələrə toxunub. O deyib ki, məhkəmə sistemi formalaşandan ədalətlilik prinsipi qorunub, lakin bunun inkişafına ehtiyac duyulur: “Bu cür konfransların keçirilməsi səmərəlidir. Çünki hakimlərimizin dünyada baş verənlərdən məlumatlı olması gələcəkdə ədalət mühakiməsinin keyfiyyətinin yaxşılaşmasına xidmət edəcək”.

BMT-nin Ədalətli Məhkəmə Hakimiyyəti üzrə Hakimlər Qrupunun koordinatoru Nihal Cayavikrama BMT tərəfindən qəbul edilən “Hakimlərin davranışı üzrə Banqalor Prinsipləri” haqqında danışıb. Onun sözlərinə görə, hakimlər üçün ən başlıcası müstəqillik, qərəzsizlik, dürüstlük və etik prinsiplərə əməl etməkdir: “Digərlərini mühakimə etmək üçün bu məqamlar hakimlərdə cəmləşməlidir. Hakimlər bərabərlik amilini də unutmamlıdır”. O, məhkəmə-hüquq sahəsində istinadən edilən ədalət prinsiplərinin çoxunun islam qaydalarından götürüldüyünü və qədim Roma qanunlarından da istifadə edildiyini söyləyib.

Türkiyə Ədliyyə Akademiyasının rəhbəri Hüseyn Yıldırım iki ölkə arasında bu sahədə əməkdaşlığın əhəmiyyətinə toxunub və bildirib ki, ədalətin bərqərar edilməsi hamının məqsədi olmalıdır.

Almaniyanın Azərbaycandakı səfiri Herbert Kvelle Azərbaycanda məhkəmə-hüquq sahəsində islahatların uğurla aparıldığını vurğulayıb. Onun fikrincə, Azərbaycan Almaniya təcrübəsindən istifadə etməklə müvəffəqiyyət əldə edə bilər.

Avropa Şurasının Ədalət mühakiməsinin səmərəliliyi üzrə Komissiyasının (CEPEJ) vitse-prezidenti Georq Stava Avropa təcrübəsindən və bu istiqamətdə aparılan islahatlardan bəhs edib.

Konfransda Türkiyə, Gürcüstan ali məhkəmələrinin hakimlərinin, Azərbaycan Ədliyyə Nazirliyinin nümayəndələrinin, Azərbaycan Hüquq İslahatları Mərkəzinin rəhbəri Anar Bağırovun mövzu ilə bağlı məruzələri də dinlənilib.

ramiz_rzayev