Daxili siyasət

Ana səhifə

Daxili siyasət

MSK sədri bələdiyyəyə seçkilərində fəaliyyətinə görə APA-ya təşəkkür edib

19 dekabr 2011 16:33 (UTC +04:00)

Bakı. Pərvin Abbasov - APA. “Noyabrın 30-da keçirilmiş bəzi bələdiyyələrə təkrar, əlavə və yeni seçkilər əvvəlki seçkilər kimi ölkəmizin həyatında mühüm hadisələrdən biri kimi tarixə düşəcək. Seçkilərin hazırlanması və keçirilməsi dövründə Azərbaycan Respublikası Konstitusiyasının, Seçki Məcəlləsinin və digər qanunvericilik aktlarının norma və tələblərinə riayət olunub”. APA-nın xəbərinə görə, bunu Mərkəzi Seçki Komissiyasının (MSK) sədri Məzahir Pənahov qurumun bu gün keçirilən iclasında deyib.

O bildirib ki, seçkilər zamanı aşkarlığın təmin olunması üçün bütün tədbirlər görülüb, müşahidəçilərin sərbəst fəaliyyəti üçün şəraitin yaradılması nəticəsində səsvermə günü seçkilərin gedişini izləyib: “Ölkə ictimaiyyətinin seçkinin nəticələri ilə dərhal tanış olması üçün səsvermə başa çatdıqdan sonra məntəqələr üzrə ilkin nəticələr Mərkəzi Seçki Komissiyasının nəzdindəki “Seçkilər” İnformasiya Mərkəzi tərəfindən 24 saat ərzində Mərkəzi Seçki Komissiyasının internet saytında yerləşdirilib.

Sözügedən seçkilərlə bağlı səsvermənin nəticələrinə dair dairə seçki komissiyalarının bələdiyyələr üzrə protokolları qanunla müəyyən edilmiş müddətdə və qaydada tərtib edilərək onlara əlavə olunmuş sənədlərlə birlikdə Mərkəzi Seçki Komissiyasına təqdim edilib. Mərkəzi Seçki Komissiyası Seçki Məcəlləsinin tələblərinə uyğun olaraq, dairə seçki komissiyaları tərəfindən təqdim edilmiş protokolları və ona əlavə edilmiş digər sənədləri yoxlayıb”.

MSK sədri seçkilərin qanunvericiliyin tələblərinə uyğun şəkildə keçirilməsinə köməklik göstərmiş dövlət qurumlarına təşəkkür edib.

Seçkilərin hazırlanıb keçirilməsi prosesinin ictimaiyyətə çatdırılmasında ölkə KİV-lərinin əhəmiyyətli rol oynadığını minnətdarlıq hissi ilə vurğulayan sədr AzTV və İctimai Televiziyanın, “Azərbaycan” qəzetinin, AzərTAc və APA informasiya agentliklərinin bu sahədəki fəaliyyətini xüsusi vurğulayaraq, onlara təşəkkürünü bildirib.

Qeyd edək ki, MSK-nın bugünkü iclasında 2011-ci il noyabrın 30-da bələdiyyələrə keçirilmiş təkrar, əlavə və yeni seçkilərin baş tutması qərara alınıb, bu seçkilərin ümumən Azərbaycan Respublikası Konstitusiyasına, Seçki Məcəlləsinə və digər qanunvericilik aktlarına uyğun keçirilməsi nəzərə alınıb. Eyni zamanda 38 saylı Nizami II (Gəncə) seçki dairəsinin 11 saylı, 50 saylı Qobustan-Xızı-Sumqayıt seçki dairəsinin 15 saylı, 62 saylı Saatlı seçki dairəsinin 1 saylı, 65 saylı Saatlı-Sabirabad-Kürdəmir seçki dairəsinin 46 saylı, 86 saylı İsmayıllı seçki dairəsinin 31 saylı və 89 saylı Göyçay-Ağdaş seçki dairəsinin 1 saylı seçki məntəqələrində seçicilərin iradəsini müəyyən etmək mümkün olmadığından, həmin məntəqələr üzrə səsvermənin nəticələri etibarsız hesab edilib. 50 saylı Qobustan-Xızı-Sumqayıt seçki dairəsi üzrə 15 saylı seçki məntəqəsindəki səsvermənin nəticələrinin ləğv edilməsi ilə bağlı Bədəli bələdiyyəsinə keçirilmiş yeni seçkilərin də etibarsız hesab olunması barədə qərar qəbul edilib. Bundan əlavə, seçki keçirilmiş 329 bələdiyyənin tam tərkibdə formalaşmasının nəzərə alınması, seçkilərin ümumi yekunları üzrə rəsmi təsdiq edilmiş bələdiyyələrə seçilmiş üzvlərin siyahısının elan edilməsi və bəzi bələdiyyələrə keçirilmiş təkrar, əlavə və yeni seçkilərin ümumi yekunlarına dair Mərkəzi Seçki Komissiyasının yekun protokolunun tərtib olunması qərara alınıb.