Daxili siyasət

Ana səhifə

Daxili siyasət

Prezident İlham Əliyev Ağcabədi rayonunda Laçın rayonundan olan məcburi köçkünlər üçün salınan qəsəbənin açılışında iştirak edib

24 dekabr 2011 14:05 (UTC +04:00)

APA-nın “AzərTAc”a istinadən verdiyi məlumata görə, dövlət başçısı və xanımı əvvəlcə ümummilli lider Heydər Əliyevin qəsəbənin mərkəzində ucaldılmış abidəsini ziyarət edərək önünə gül dəstələri qoyublar. Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov məlumat verib ki, ölkədə aparılan tikinti-quruculuq işləri Laçından olan məcburi köçkünlərin məskunlaşdıqları Taxtakörpü ərazisində də vüsət alıb. Buradakı parklarda, Şəhidlər kompleksində və Laçın Rayon İcra Hakimiyyətinin inzibati binasının ətrafında abadlıq işləri həyata keçirilib, yaşıllıqlar salınıb. Bu ilin əvvəlindən Taxtakörpü ərazisinə 21 kilometr uzunluğunda təbii qaz xəttinin çəkilişi başa çatdırılıb, 4 kilometrlik içməli su xətlərində təmir-bərpa işləri aparılıb, köhnə borular yeniləri ilə əvəzlənib. Alxaslı və Qarakeşiş obalarında modul tipli sutəmizləyici qurğular quraşdırılıb.
Taxtakörpü-Mais və Taxtakörpü-Alxaslı avtomobil yolunda təmir işləri aparılıb, 7,9 min kvadratmetr yol asfaltlanıb.

Diqqətə çatdırılıb ki, respublikanın ümumilikdə 58 rayon və şəhərində müvəqqəti məskunlaşan 71,2 min nəfərdən 13 mini Taxtakörpü ərazisində yerləşin. İndi burada məcburi köçkünlər üçün yeni yaşayış qəsəbələri salınır. Bu qəsəbələrdən biri də dövlət başçısının 2004-cü il 1 iyul tarixli sərəncamı ilə təsdiq edilmiş Dövlət Proqramına əlavələr olunması haqqında 2007-ci il 31 oktyabr tarixli Sərəncamına əsasən Ağcabədi rayonu Taxtakörpü ərazisində Laçın rayonundan olan 552 məcburi köçkün ailəsi üçün salınan yeni qəsəbədir. Bu qəsəbənin salınması Azərbaycan prezidentinin məcburi köçkünlərin sosial-iqtisadi və məişət şəraitinin yaxşılaşdırılması istiqamətində həyata keçirdiyi növbəti mühüm addımlardan biridir.

Bildirilib ki, ümumi sahəsi 111 hektar olan qəsəbədə inşa edilən evlərin sahəsi ümumilikdə 31 min 179 kvadratmetrdən çoxdur. Hər bir evin 12 sot torpaq sahəsi var. Qəsəbədə müasir standartlara cavab verən, 360 şagird yeri olan məktəb binası, uşaq bağçası, bir klub-icma mərkəzi, qəsəbə nümayəndəliyi üçün inzibati bina inşa edilib, park və yaşıllıqlar salınıb. Qəsəbə elektrik, qaz və içməli su ilə təmin olunmuşdur. Yağış sularının axıdılması üçün drenaj tikilib. Qəsəbədə ümumi uzunluğu 15 kilometr olan yol salınıb.

Dövlət başçısına və xanımına yeni qəsəbənin tikintisi üzrə əsas texniki-iqtisadi göstəricilər barədə məlumat verilib.

Bildirilib ki, zəruri infrastrukturun yaradıldığı qəsəbədəki evlərin 49-u birotaqlı, 194-ü ikiotaqlı, 237-si üçotaqlı, 72-si isə dördotaqlıdır. Qəsəbədə iki transformator stansiyası, altı qaztənzimləyici məntəqə yaradılmış, biraşırımlı körpülər inşa olunmuş, geniş yaşıllıq zolaqları salınıb.
Prezident İlham Əliyev və xanımı Mehriban Əliyeva məcburi köçkün Cənnət Əliyevin evində yaradılan şəraitlə tanış olublar.

Dövlət başçısı çay süfrəsi arxasında ev sahibi ilə söhbət edib.
Sonra prezident İlham Əliyev və Azərbaycanın birinci xanımı Mehriban Əliyeva laçınlı məcburi köçkünlərin istehsal etdikləri məhsullara baxıblar.
Dövlət başçısı qəsəbənin sakinləri ilə görüşüb çıxış edib. Məcburi köçkün Əmirxan Zeynalov yaradılan şəraitə görə Prezident İlham Əliyevə qəsəbə sakinləri adından təşəkkür edib. Sonra xatirə şəkli çəkdirilib. Daha sonra dövlət başçısı və xanımı 360 yerlik məktəb binasında yaradılan şəraitlə tanış olublar.

Prezident İlham Əliyev Laçından olan məşhur şəxsiyyətlər haqqında məlumatların əks olunduğu stendə də baxıb. Məktəbdə Heydər Əliyev və Prezident İlham Əliyevin təhsilə olan diqqət və qayğısını əks etdirən foto-guşələr yaradılıb. Burada Heydər Əliyev Fondunun təhsillə bağlı həyata keçirdiyi irimiqyaslı layihələrdən bəhs edən guşə də var.

Dövlət başçısı yeni qəsəbədə yaradılmış şəraitdən razılığını bildirdi, tapşırıq və tövsiyələrini verib.

Prezident Əliyev