Daxili siyasət

Ana səhifə

Daxili siyasət

Ziyalılar Forumunun toplantısının baş tutmaması ilə bağlı mətbuat konfransı keçirilib

30 dekabr 2011 13:45 (UTC +04:00)

Bakı. Ramil Məmmədli – APA. Ziyalılar Forumunun təşkilatçıları qurumun toplantısının ötən gün baş tutmaması ilə bağlı mətbuat konfransı keçiriblər.

APA-nın məlumatına görə, mətbuat konfransını tarixçi-alim Cəmil Həsənli aparıb. C. Həsənli deyib ki, tədbirin keçirilməli olduğu “Hyatt Regency” mehmanxanasının rəhbərliyi yığıncağın keçirilməli olduğu korpusunda enerji təchizatında problemlərin olduğunu əsas gətirərək təşkilatçılara tədbir keçirməyin mümkünsüz olduğunu bildirib. Bu arqumentə inanmadıqlarını deyən C. Həsənli bunu otel rəhbərliyinə edilən təzyiqin nəticəsi kimi dəyərləndirdiklərini söyləyib: “Ziyalılar forumun toplantısının qarşısını bu cür almaq çox primitiv görünür. Bizim irad və təkliflərimiz düzgün qəbul olunmur. Ziyalılar Forumuna toplaşanların siyasi iddiası yoxdur. Biz millətin içindən çıxmışıq və indiyə qədər vətəndaşlarımızın problemlərini, cəmiyyəti uçuruma aparan məsələləri yaxşı bilirik”.

C. Həsənli vurğulayıb ki, onların ötən gün keçirmək istədikləri toplantıda müzakirə mövzusu Azərbaycan gənclərin problemləri ilə bağlı olub: “Təəssüf ki, cəmiyyət bir sıra məqamlarda yalan üzərində formalaşdırılır. Bu da uğurlu gələcək vəd etmir”.

Ölkədəki mövcud vəziyyəti təhlil edən xalq yazıçısı Əkrəm Əylisli bildirib ki, onlar problemləri demək və həll etmək istəyirlər. Ə. Əylisli “Ərəb baharı” ilə bağlı da danışıb: “Həmin ölkələrdə baş verən hadisələr demokratiyanın formalaşmasına gətirib çıxarmadı, əksinə dövləti dağıtdı. Biz Azərbaycanda bu cür vəziyyətin yaranmasını istəmirik”.

Xalq yazıçısı Rüstəm İbrahimbəyov isə diqqəti ölkədə rüşvət hallarına yönəldib: “Hamı bilir ki, uşaq bağçasından universitetlərə qədər hər yerdə rüşvət halları mövcuddur. Bu, Azərbaycanın gələcəyini təhlükəyə aparır. Bu problem həllini tapmalıdır”. R. İbrahimbəyov daxili siyasi prosesləri tənqid edib və bu proseslərdə iştirak etməyəcəyini söyləyib: “Ziyalı mövqeyindən çıxış etməklə ölkədəki problemlərin həll olunmasını istəyirik. Ziyalı baş verənləri - həqiqəti deməlidir”.

Forumun koordinatoru Eldar Namazov isə “Hyatt Regency” mehmanxanasını baş verənlərlə bağlı məhkəməyə verməyəcəklərini deyib: “Bu mehmanxana dünyada mövcud olan böyük şəbəkənin tərkibində fəaliyyət göstərir. Həmin şirkətlə danışmışıq, onlar da bunu texniki səbəb kimi təqdim ediblər”.

Professor Rafiq Əliyev də çıxışını ölkədəki problemlər üzərində qurub.

Qeyd edək ki, Ziyalılar Forumunun dekabrın 29-da keçirilməli olan toplantısı “Hyatt Regency” otelində enerji təchizatında problemlər yaranması səbəbindən baş tutmayıb.