Daxili siyasət

Ana səhifə

Daxili siyasət

Elnur Aslanov: “Cənab Prezident yeni inkişaf konsepsiyasının hazırlanmasına dair sərəncam verməklə Azərbaycanın keyfiyyət transformasiyasının zəruri əsaslarının işlənib ictimaiyyətə təqdim edilməsinə rəvac verib”

30 dekabr 2011 15:14 (UTC +04:00)

- “Azərbaycan 2020: Gələcəyə Baxış” inkişaf konsepsiyası ilə bağlı Prezident Administrasiyasının rəhbəri, akademik Ramiz Mehdiyevin rəhbərliyi ilə keçirilən görüş hansı məqamlarla əlamətdar oldu?

- Tamamilə doğrudur, dekabr ayının 29-da Azərbaycanın yeni inkişaf strategiyası ilə bağlı müzakirələr keçirilib, cəmiyyətin müxtəlif təbəqələrinin nümayəndələrinin iştirakı ilə fikir mübadiləsi aparılıb. Bu konseptual sənədin Azərbaycan xalqının gələcəyi üçün əhəmiyyətini nəzərə alaraq, onun hazırlanmasına mütəxəssislərin, elm adamlarının, geniş ziyalı kütləsinin cəlb edilməsi cənab Prezidentin sərəncamından irəli gələn vəzifədir. Bu dövlət və vətəndaş arasında mövcud sağlam münasibətlərin təzahürüdür. Tarixən cəmiyyətin maarifçi qüvvəsini yerinə yetirən ziyalı təbəqəsi, milli inkişafın əsaslarının hazırlanmasında xüsusi rol oynayıb. Bu gün, onların bilik və bacarıqlarından istifadə edilməsi, yeni kreativ, biliklərə əsaslanan innovativ iqtisadiyyatın inkişafında mühüm əhəmiyyət kəsb edir. Təsadüfi deyil ki, tədbirdə dövlət nümayəndələri ilə yanaşı, millət vəkilləri, ali məktəb və elm müəssisələrinin rəhbərləri, tədqiqat mərkəzlərinin və ictimaiyyətin nümayəndələri iştirak edirdi. Müzakirələr zamanı səslənən fikirlər insan fəaliyyətinin müxtəlif aspektlərini əhatə edirdi. Bu, inkişaf konsepsiyasının daha da zənginləşməsinə və onun çoxşaxəliliyinə xidmət edir.

- Bu görüşün əhəmiyyətini nədə görürsünüz?

- Bu dialoq xarakterli görüşün əhəmiyyəti təkcə onun tərkibinin rəngarəngliyində deyil, eyni zamanda müxtəlif fikirlərin, ideyaların plüralizmində, və onların strateji fəaliyyət planına verdiyi özünəməxsus çalarlarındadır. Çünki sırf texnokrat mövqeyindən yanaşılanda belə bir konsepsiyanın mütəxəssislər tərəfindən hazırlanması daha məqsədəuyğun hesab edilir. Lakin bu cəmiyyətdə baş verən hadisələri, vətəndaşların qayğılarını, mövcud və qısa müddət ərzində həllini gözləyən problemləri nəzərə almaya da bilər. Azərbaycan rəhbərliyi isə tamamilə fərqli bir prizmadan çıxış edir. Məqsəd, əhalinin həyat tərzinin daimi yaxşılaşdırılması fonunda, yeni sosial-iqtisadi münasibətlərin təşəkkül tapmasını şərtləndirən zəruri addımların atılmasını, dəyişikliklərin həyata keçirilməsini təmin etməkdir. Buna görə də, ictimaiyyət nümayəndələri və ziyalılarla təşkil edilən birbaşa dialoq, cəmiyyəti narahat edən məsələlərin yeni inkişaf konsepsiyasında öz əksini tapmasına və mövcud resursların rasional və optimal istifadəsi sayəsində onların həlli yollarının müəyyən edilməsinə şərait yaradır. Cənab Prezident yeni inkişaf konsepsiyasının hazırlanmasına dair Sərəncam verməklə Azərbaycanın keyfiyyət transformasiyasının zəruri əsaslarının işlənib ictimaiyyətə təqdim edilməsinə rəvac verib.

Eyni zamanda, dövlət və vətəndaş münasibətləri qarşılıqlı əməkdaşlıq, hər bir tərəfin öz məsuliyyətini dərk edib, götürdüyü öhdəliklərə uyğun fəaliyyət göstərməsi istiqamətində inkişaf edir və təyin edilən hədəflərə qısa müddət ərzində və səmərəli şəkildə nail olmağa imkan verir. Bu, məhz prezident İlham Əliyev tərəfindən məqsədyönlü şəkildə davam etdirilən səmərəli və ədalətli dövlətçiliyin bariz nümunəsidir. Biz bu siyasi xəttə sadiqik və onu Azərbaycan cəmiyyətinin müxtəlif təbəqələrinin, o cümlədən ziyalıların, mütəxəssislərin birgə fəaliyyəti sayəsində gələcəkdə də davam etdirəcəyik. Növbəti 2012-ci ildə geniş tərkibdə belə görüşlərin keçirilməsi planlaşdırılır.