Daxili siyasət

Ana səhifə

Daxili siyasət

Prezident İlham Əliyev Bakı Metropoliteninin yenidən qurulmuş “Koroğlu” stansiyasının açılış mərasimində iştirak edib

30 dekabr 2011 16:56 (UTC +04:00)

Bakı-APA. Azərbaycan prezidenti İlham Əliyev və xanımı Mehriban Əliyeva Bakı Metropoliteninin yenidən qurulmuş “Koroğlu” (keçmiş “Məşədi Əzizbəyov”) stansiyasının, yeraltı piyada keçidinin açılışında iştirak etmiş, yeni salınmış park və burada yaradılmış musiqili od fəvvarə kompleksi ilə tanış olublar. “Koroğlu” stansiyasında dövlət başçısını və xanımını Bakı Metropoliteninin əməkdaşları hərarətlə qarşılayıblar. Prezident İlham Əliyev stansiyanın rəmzi açılışını bildirən lenti kəsib. Bakı Metropoliteninin rəisi Tağı Əhmədov dövlətimizin başçısına və xanımına stansiyanın yeni yerüstü binası haqqında məlumat verib. Onun sözlərinə görə, stansiyanın piramida formasında inşa edilmiş yeni yerüstü binasında müasir işıqlandırma sistemi quraşdırılıb. Prezident İlham Əliyev və xanımı Mehriban Əliyeva xalq qəhrəmanı Koroğlunun burada ucaldılacaq abidəsinin eskiz layihələrinə baxıblar. Dövlət başçısı və xanımı platformada yaradılan şəraitlə tanış olublar. Prezidentə stansiyada “SOS” həyəcan sisteminin tətbiq edildiyi barədə məlumat verilib.

Daha sonra prezident İlham Əliyev və xanımı Mehriban Əliyeva Heydər Əliyev prospekti və Ziya Bünyadov prospektinin kəsişməsində inşa edilmiş yeraltı piyada keçidi ilə tanış olublar. Dövlət başçısı və xanımı keçidin texniki göstəricilərini əks etdirən stendlərə baxıblar. Nəqliyyat naziri Ziya Məmmədov məlumat verib ki, burada uzunluğu 140 və 65 metr olmaqla iki tunel istifadəyə verilib. Hər iki tunelin eni 6 metrdir. Tunellərdə müşahidə kameraları və metro stansiyasına girişi göstərən elektron istiqamətləndirici lövhələr quraşdırılıb.

Dövlət başçısı və xanımı daha sonra Bakının Nizami rayonunda salınmış parkın ərazisi və burada quraşdırılmış musiqili od fəvvarə kompleksi ilə tanış olublar. Bakı Şəhər İcra Hakimiyyətinin başçısı Hacıbala Abutalıbov məlumat verib ki, parkın ərazisində 12 min kvadratmetr sahədə yaşıllıq salınıb, Hollandiyadan və İtaliyadan gətirilmiş gül və bəzək kolları əkilib. Burada müasir işıqlandırma sistemi və oturacaqlar quraşdırılıb. Parkın ərazisində inşa olunmuş musiqili od fəvvarə kompleksinin struktur hissəsinin konstruksiyası 60 kilometr/saniyə gücündə küləyə və 9 ballıq zəlzələyə davamlıdır.

Diqqətə çatdırıldı ki, alov simvolu cilalanmış paslanmayan metaldan və kristaldan ibarətdir. Kompleksin tikintisində ABŞ, İngiltərə və İtaliya şirkətləri iştirak etmişlər.

Dövlətimizin başçısı və xanımı musiqili od fəvvarə kompleksinin postamentinin altında quraşdırılmış avtomatlaşdırılmış sistem ilə tanış olublar. Sonra Prezident İlham Əliyev və xanımı musiqi sədaları altında fəaliyyət göstərən od fəvvarəyə baxıblar. Yaradılmış şəraiti yüksək qiymətləndirən dövlət başçısı tapşırıq və tövsiyələrini verib.