Daxili siyasət

Ana səhifə

Daxili siyasət

AMİP-də ciddi fikir ayrılığı yaranıb

06 yanvar 2012 12:23 (UTC +04:00)

APA-nın məlumatına görə, partiyanın mətbuat və təbliğat katibi Əli Orucovun İP Koordinasiya Şurasına namizədliyini irəli sürməsi vəziyyəti daha da gərginləşdirib. AMİP sədri Yusif Bağırzadə APA-nın bu mövzuda sualına münasibət bildirməkdən yayınaraq deyib ki, bununla əlaqədar səlahiyyət partiyanın Mərkəzi Şurasının sədri Rəşad Bayramova verilib.

AMİP baş katibi Arzuxan Əlizadə məsələnin çözüləcəyinə inandığını və Ə. Orucovun mövqeyindən daşınacağına ümidli olduğunu söyləyib: “İctimai Palatanın Koordinasiya Şurasına keçiriləcək seçkiyə iki gün qalıb. Əli Orucov da ola bilsin əvvəlcədən namizədliyi ilə bağlı qərar verib. Siyasi Şuranın iclası ötən gün olub. Hesab edirəm ki, Əli Orucov qərarla tanış olduqdan sonra öz mövqeyini dəyişməlidir. O, uzun müddət partiyanın rəhbərliyində təmsil olunub, bu gün də Mərkəzi Şuranın üzvü kimi fəaliyyətini davam etdirir”.

A. Əlizadə əlavə edib ki, AMİP-də qərarlar verilənə qədər fikir müxtəlifliyi ola bilər: “Amma qərar verildikdən sonra hamı bir nəfər kimi bu qərara tabedir. Əli Orucov da bu məsələdə istisna deyil. Hesab edirəm ki, yaxın iki gün ərzində məsələ çözüləcək və Əli Orucov partiyanın qərarına hörmətlə yanaşacaq”.

Əli Orucov isə gərginliyin yaranmasında digər tərəfi ittiham edərək bildirib ki, Siyasi Şuranın sonuncu iclasında iştirak edib və qərardan da həmin gün xəbərdar olub: “Ancaq mən fərdi qaydada iddiamı ortaya qoymuşam və İctimai Palatada partiyanı təmsil etmirəm. İctimai Palatada təmsil olunan digər AMİP-çilər də partiyanı təmsil etmir. Əgər İctimai Palatanın fəaliyyətində fərdi qaydada iştirak ediriksə, bu qurumun Koordinasiya Şurasında, o cümlədən digər seçkili orqanlarında da təmsil olunmaq hüququmuz var. Siyasi Şuranın bu qərarı məntiqə sığmır. Necə olar ki, AMİP üzvləri İctimai Palatada təmsil oluna bilərlər, amma Koordinasiya Şurasına üzv seçilə bilməzlər? Bunu mənə anlatsınlar”.

Ə. Orucov geri çəkilməyəcəyini və mövqeyində israrlı olduğunu bəyan edib: “Hər hansı addımı atmazdan öncə düşünürəm, təhlillər aparıram, əqidə dostlarımla məsləhətləşirəm. Namizədliyimi düşünülməmiş şəkildə irəli sürməmişəm. Digər tərəfdən, hər zaman Etibar Məmmədovu özümə lider hesab etmişəm, onun məsləhət və tövsiyələrinə ehtiyac duyduğum qədər, buna uyğun da hərəkət edirəm”.

Qeyd edək ki, bu gün AMİP Siyasi Şurasının növbəti iclası keçirilib. İclasda AMİP-in İctimai Palata ilə münasibətləri və Koordinasiya Şurasına seçkilər məsələsi müzakirə olunub. Siyasi Şura AMİP-in İctimai Palatada fəaliyyətinin dayandırılması ilə bağlı 18 aprel 2011-ci il tarixli qərarı qüvvədə saxlayıb və İctimai Palatanın Koordinasiya Şurasına seçkilərdə İctimai Palatada təmsil olunan AMİP üzvlərinin namizəd qismində iştirakı məqsədəuyğun sayılmayıb.

Xatırladaq ki, AMİP-in mətbuat və təbliğat katibi Əli Orucov İctimai Palatanın Koordinasiya Şurasına keçiriləcək seçkilərdə öz namizədliyini irəli sürüb. Koordinasiya Şurasına seçki yanvarın 8-də baş tutacaq.

AMİP