Daxili siyasət

Ana səhifə

Daxili siyasət

Müsavat Məclisinin növbəti iclası keçirilib

07 yanvar 2012 12:47 (UTC +04:00)

Bakı. Ramil Məmmədli - APA. Bu gün Müsavat Partiyası Məclisinin növbəti iclası keçirilib. APA-nın məlumatına görə, iclasın gündəliyinə yeni seçilmiş rayon təşkilat sədrlərinin səlahiyyətlərinin təsdiqi, ictimai-siyasi vəziyyət və qarşıda duran vəzifələr, partiyanın VIII qurultayının keçirilməsi, qurumun 2012-ci ildə fəaliyyət istiqamətləri daxil edilib.

Əvvəlcə iclasda rayon təşkilat sədrlərinin səlahiyyətləri və Məclis üzvləri təsdiq olunub.

Sonra partiyanın başqanı İsa Qəmbər hesabat xarakterli çıxış edib. O deyib ki, 2012-ci ildə partiyanın hədəflərindən biri də səylərin artırılması, gücün bu istiqamətdə birləşdirilməsidir. İ. Qəmbər İctimai Palatanın ötən il üçün fəaliyyətini irəliləyiş kimi dəyərləndirib: “Ölkədə azadlıqları bərpa etmək üçün müxtəlif aksiya və mitinqlər keçirilib. 2 aprel aksiyası 2011-ci ilin ən güclü aksiyası oldu. Bu aksiya hakimiyyəti ciddi şəkildə narahat etdi, beynəlxalq aləmin diqqətini çəkdi. Aksiyalarda tutulanların həbsdə saxlanması isə iqtidarın ciddi səhvidir”.

İclasda müxalifət-iqtidar dialoqu ilə bağlı məsələ də müzakirə mövzusu olub. A. Səmədbəyli deyib ki, müxalifət, o cümlədən Müsavat Partiyası mütəmadi olaraq dialoqla bağlı mövqeyini açıqlayıb, hətta iqtidara müvafiq sənəd də təqdim edilib.

Sonra çıxışlar olub. Məclis üzvü Mustafa Hacıbəyli aksiyaların tərəfdarı olduğunu bildirib, deyib ki, partiya icazəli aksiyaların keçirilməsindən imtina etməməlidir: “Bəzən hətta razılaşdırılmış yerdə mitinqin keçirilməsinə etiraz edirlər. Məncə bu barədə müzakirə aparılmalıdır”. M. Hacıbəyli qurultayın tez bir zamanda keçirilməsi və İsa Qəmbərin prezidentliyə namizədliyinin irəli sürülməsi təklifi ilə də çıxış edib: “Bu onun cəmiyyətdə tanınması, imici ilə də bağlıdır. Rəsul Quliyevin, Əli Kərimlinin prezidentliyə namizədliyi ilə bağlı da cəmiyyətdə fikirlər dövriyyəyə buraxılıb. Hesab edirəm ki, müxalifətin vahid namizədi İsa Qəmbər olmalıdır. Qurultayda bu məsələyə aydınlıq gətirilməli, mübahisələrə son qoyulmalıdır”.

Məclis üzvü Sabir Məmmədli isə çıxışını tənqidi fikirlər üzərində qurub: “Heç bir ölkədə hakimiyyət boşqabda kiməsə verilmir. İqtidarın cızdığı xətdən çıxa bilmirik. Biz bundan qaçmalıyıq. Bizim müxalifətçiliyimiz “Yeni Müsavat” qəzetinin müxalifətçiliyi qədərdir. Nə çox, nə az... İnternetdə, sosial şəbəkələrdə də fəallaşmaq lazımdır”.

Məclis üzvü Qubad İbadoğlu ölkədəki iqtisadi durum, sosial vəziyyəti barədə danışıb, iqtidarın iqtisadi islahatları, təqaüdçülərə münasibətini tənqid edib.

Müsavat Gənclər Təşkilatı Səxavət Soltanlı isə bu il Müsavatçı Gənclər Forumunun keçirilməsi, bununla bağlı Təşkilat Komitəsinin yaradılması təklifini irəli sürüb.

Məclis üzvü Tarif Əliyev isə partiyanın və İctimai Palatanın dəstəyi ilə xaricdən yayımlanan müstəqil televiziya kanalının açılması istiqamətində işlərin görülməsini təklif edib: “Bununla informasiya blokadasını yara bilərik”.

Sonra iclasda qurultayın vaxtı müəyyənləşib, fəaliyyət istiqamətləri təsdiq olunub, 2011-ci il aprelin 2-də keçirilən etiraz aksiyasında saxlanılanların azadlığa buraxılması tələbi ilə bəyanat qəbul edilib.

Sonda İ. Qəmbər bəzi partiya üzvlərini təşkilatın işində fəal iştiraka görə Müsavatın 100 illiyi diplomu ilə təltif edib.

müsavat