Daxili siyasət

Ana səhifə

Daxili siyasət

İsa Qəmbərin yenidən Müsavat Partiyasının başqanı olub-olmaması ilə bağlı partiyada yekdil fikir yoxdur

12 yanvar 2012 14:02 (UTC +04:00)

Bunu APA-ya açıqlamasında Müsavat Partiyasının VIII qurultayının nümayəndəsi, “Yeni Müsavat” qəzetinin baş redaktoru Rauf Arifoğlu deyib.

O bildirib ki, İ. Qəmbərin başqan kimi qalması partiyada, həm də cəmiyyətdə çoxluğun rəyidir: “Təxminən bir il-il yarım öncə İsa bəyi başqanlıqdan getməməyə, hətta partiya qərargahının qarşısında çadırlar quraraq ondan iş başında qalmasını tələb etmək addımları atmağa çağırmışam. Amma Nizamnamə tələblərinə riayət edərək başqanlıqdan getməklə bağlı qərar İsa bəyin özünün olduğuna görə, çox şey etmək, həyata keçirmək mümkün olmayıb. İndi növbəti bir dalğa gəlib, partiyanın rəhbərliyində olan insanlar fikirləşirlər ki, İsa bəy başqanlıqdan getməməlidir, bunun da yolu Nizamnamədən məhdudlaşdırıcı maddənin götürülməsidir. Belə təşəbbüslər var və mənə də məlumdur. Lakin mən hələlik heç bir təşəbbüsə qoşulmuram. Sadəcə, partiyanın sıravi üzvü və qurultay nümayəndəsi kimi proseslərin gedişini izləyirəm. Bir neçə dəfə demişəm, bir daha təkrar edirəm: Müsavat Partiyasının daxilində onlarla layiqli insan var ki, Müsavatın başqanı ola bilər. Onlardan bir neçəsi iddialarını bu və ya digər şəkildə ortaya qoyub, buna da sıcaq baxıram. Qurultay ərəfəsində, yaxud qurultay günündə namizədlər çoxsaylı olarsa, onların içərisində seçim edəcəyəm. Yaxud namizəd bir nəfər olarsa, həmin namizədə münasibətimi səsvermə ilə bildirəcək, prosesdə iştirak edəcəyəm ”.

“Müsavat Partiyasının başqanı postuna elə bir şəxs seçilə bilərmi ki, nəticədə partiyadan istefa verməli olasınız” sualına isə R. Arifoğlu belə cavab verib: “Hələ ki, məni partiyadan ayıra biləcək şəxs iddiasını ortaya qoymayıb. Mənim bu partiya ilə 22-23 illik bağlılığım var. Bu mənim üçün çox ağrılı bir proses olardı. Ümid edirəm ki, hər şey Müsavat Partiyası və Azərbaycan üçün yaxşı olacaq. Yəni, ya uyğun namizəd seçiləcək, ya da İsa
bəy minlərlə partiya üzvünün təkidli tələbi ilə öz postunda qalacaq”.

“Müsavat Partiyasının başqanlığına iki dəfədən artıq seçilməyi məhdudlaşdıran müddəanın dəyişdirilməsini vaxtilə müsavatçılar, o cümlədən Arif Hacılı da, mən də təklif etmişik. Amma bu məsələ bitib. Bu məsələnin yenidən gündəmə daşınmasının mənası yoxdur. Hətta həmin müddəa İsa bəyin iradəsinə ziddi olaraq dəyişdirilsə belə, İsa bəy namizədliyini irəli sürməyəcəyini söyləyib. Yəni, bu məsələ artıq bitib”. Bunu isə APA-ya açıqlamasında Müsavat Partiyası Məclisinin üzvü, partiya başqanlığına ən real namizədlərdən olan Arif Hacılının qardaşı Mustafa Hacıbəyli deyib. O bildirib ki, Müsavat Azərbaycanın ana müxalifət partiyasıdır, buna görə də bu qurumun başqanlığı uğrunda rəqabət gözləntisi şübhəsizdir: “Ancaq Müsavat Partiyasında seçkilər həmişə demokratik təşkil olunub, yenə də demokratik olacaq. Müsavatçılar namizədlərin arasından ən layiqlisini seçəcək. İndiki müzakirələri də normal sayıram”.

Müsavat Partiyasının Divan üzvü Vurğun Əyyubun “Amma mən hesab edirəm ki, Müsavata başqa bir tip və xarakterdə olan şəxs rəhbərlik etməlidir” deyərək birbaşa A. Hacılıya qarşı çıxmasına gəlincə, M. Hacıbəylinin münasibəti belə olub: “Bu açıqlama onun hüququdur. Bu mövqe, məncə, şəxsi münasibətdən irəli gələ bilər”.

Müsavat Partiyası başqanının müavini Gülağa Aslanlı APA-ya deyib ki, partiyanın VI qurultayında Nizamnaməyə bir şəxsin iki dəfədən artıq başqan seçilməsini qadağan edən müddəanın salınması demokratik addım olub: “Müsavat Partiyası ənənələrinə sadiq qalaraq, belə bir dəyişikliyi qəbul edib. Məncə, dünya praktikasında belə bir müddəa yalnız Müsavat Partiyasında var. Bu dəyişikliyi o zaman da alqışlamışam, indi də alqışlayıram. Amma hər bir partiyanın qurultayının xüsusi səlahiyyəti var. Qurultay istənilən vaxt istənilən maddədə dəyişiklik edə bilər. Şəraitə, zamana, ölkədəki vəziyyətə uyğun dəyişiklik olması mümkündür. Mən Nizamnaməyə dəyişiklik ehtimalını elə ehtimal kimi saxlayıram. Partiya qurultayının buna haqqı, səlahiyyəti var”.

G. Aslanlı Nizamnamədə bir şəxsin iki dəfədən artıq başqan seçilməsinin qarşısını alan maddənin saxlanılmasının tərəfdarı olduğunu da vurğulayıb: “Məncə, Müsavat Partiyası həmin maddənin saxlanılması, yaxud ləğv edilməsi ilə böyük itkilərə məruz qalmayacaq. Partiya yenə də irəliyə doğru addımlaya biləcək”.

Xatırladaq ki, Müsavat Partiyası Məclisinin sədri Arzu Səmədbəyli APA-ya açıqlamasında başqanlıqla bağlı məhdudiyyətin Nizamnamədən çıxarılması və İsa Qəmbərin yenidən başqan seçilməsinin birmənalı tərəfdarı olduğunu vurğulayıb.

Müsavat Partiyasının indiki Nizamnaməsinə görə, hazırkı başqan İsa Qəmbər namizədliyini irəli sürə bilməz. İ. Qəmbər özü də dəfələrlə mətbuata müsahibələrində partiyanın VIII qurultayında başqanlığa namizədliyini irəli sürməyəcəyini açıqlayıb.

Müsavat Partiyasının VIII qurultayının bu il martın 3-4-də keçirilməsi qərara alınıb.

Müsavat