Daxili siyasət

Ana səhifə

Daxili siyasət

Qubad İbadoğlu: “İsa Qəmbər növbəti prezident seçkiləri üçün müxalifətin ən layiqli, ən şanslı namizədidir” - MÜSAHİBƏ

Qubad İbadoğlu: “İsa Qəmbər növbəti prezident seçkiləri üçün müxalifətin ən layiqli, ən şanslı namizədidir” - <font color=red>MÜSAHİBƏ</font>

13 yanvar 2012 16:16 (UTC +04:00)

Bakı. Pərvin Abbasov – APA. Müsavat Partiyası Divanının üzvü Qubad İbadoğlunun APA-ya müsahibəsi.

- Müsavat Partiyası Məclisinin sədri Arzu Səmədbəyli bildirib ki, partiyanın Nizamnaməsindən bir şəxsin iki dəfədən artıq başqan seçilməsini məhdudlaşdıran müddəa götürülməli və İsa Qəmbər yenidən başqan seçilməlidir. Bu təklifə münasibətiniz necədir?

- Hər bir partiya üzvünün, təəssübkeşinin, funksionerinin bu istiqamətdə müraciət etmək, təklif irəli sürmək hüququ var. Bunlara hörmətlə yanaşıram. Bu, İsa bəyin indiyə qədərki xidmətlərindən, cəmiyyətdəki mövqelərindən, həm də partiyada rəhbər dəyişikliyindən yaranacaq narahatlıqdan yaranan müraciətdir. Bu baxımdan, bu cür təklifləri normal qarşılayıram. Hesab edirəm ki, bu müzakirələr davam etməlidir. Amma onu da bilmək lazımdır ki, məhz İsa bəy özü Nizamnamədə bir şəxsin iki dəfədən artıq başqan seçilməsini əngəlləyən müddəanın müəllifi, təəssübkeşi olub. Bununla da o, növbəti bir demokratik ənənə gətirib, strateji baxış, alternativlər yaratmaq imkanlarını ortaya qoyub. Hesab edirəm ki, bu dəyişiklik şansını dəyərləndirmək lazımdır. Biz çalışmalıyıq ki, bu cür dəyişikliklər həm Müsavat Partiyası, həm də Azərbaycan üçün müsbət nəticələr versin. Bu, Azərbaycan cəmiyyəti üçün çox yaxşı bir nümunə ola bilər.

- Siz Müsavat Partiyasının başqanlığına namizədliyinizi irəli sürməklə bağlı qərar vermisinizmi?

- Bu qərarı başqanlığa namizədliklə bağlı prosesə rəsmi start verildikdən sonra elan etmək daha düzgün olardı. Hələ bu prosesə rəsmi start verilməyib. Start verildikdən sonra yekun qərarımı açıqlayacağam. Hesab edirəm ki, Müsavat Partiyası şərəfli tarixinə layiq başqan seçməlidir. Amma bəri başdan deyə bilərəm ki, biz yanvarın 16-da Qurultaya Hazırlıq üzrə Təşkilat Komitəsinin növbəti yığıncağını keçirəcək və qurultayqabağı dövrdə müəyyən qərarlar verəcəyik. Bu qərarlar həm təşkilati məsələlər, həm də partiya Nizamnaməsinin təkmilləşdirilməsi, hazırkı proqram sənədinin müasirləşdirilməsi istiqamətində olacaq. Mən Təşkilat Komitəsinin Proqram və Nizamnamə Qrupuna məsulam. Biz artıq partiyanın Nizamnaməsinə dəyişikliklər layihəsini bir neçə dəfə müzakirə etmişik. Hesab edirəm ki, vacib dəyişikliklərdən biri partiya başqanı və onun fəaliyyət müddəti ilə bağlı olmalıdır. Şəxsən mən hesab edirəm ki, partiyanın qurultayı indiki kimi uzun müddətdən bir deyil, iki ildən bir keçirilməlidir. Başqanın səlahiyyət müddətinin azaldılması ilə bağlı təklif şəxsən mənim öz təklifimdir. Digər təkliflərlə yanaşı, bu təklifi də irəli sürəcəyəm. Başqa təkliflər də var, məsələn başqanın statusu haqqında. Təbii ki, dəyişikliklərlə bağlı son qərarı qurultay verəcək.

- Belə bir məlumat var ki, Arif Hacılı başqan seçiləcəyi halda bir neçə şəxs Müsavat Partiyasından istefa verəcək. Həmin şəxslərin arasında Sizin də adınız çəkilir. Bu məlumat nə qədər həqiqətdir?

- Sözün düzü, məndə partiyada kiminsə seçiləcəyi halda kimlərinsə istefa verəcəyi ilə bağlı məlumat yoxdur. Məlumat yoxdursa, deməli, mənim adımın dediyiniz siyahıda olması da mümkün deyil. Düzdür, partiyada hamının qəbul etdiyi yeganə namizəd var və bu şəxs də partiyanın hazırkı başqanıdır. Adı mətbuatda hallanan namizədlərə gəlincə, onlara partiyadaxili münasibətlər fərqlidir. Mən bunu normal qəbul edirəm, hesab edirəm ki, belə də olmalıdır. Əslində, belə bir məsuliyyətli dövrdə bu cür müzakirələr partiyadaxili demokratiyanın bir göstəricisidir. Müxtəlif mövqelər və müzakirələr ən mükəmməl variantın tapılması üçün vacibdir. Bir şeyi də deyim ki, mən Müsavat Partiyasının həm tarixinə, həm ideologiyasına, keçmiş və indiki fəaliyyətinə və digər məsələlərə önəm verərək bu partiyada təmsil olunmuşam. Amma bütün bunlarla yanaşı, mənim üçün də partiya başqanının kim olması da çox önəmli məsələdir.

- Sonuncu cümlənizdən belə anlaşılır ki, Siz də Müsavat Partiyasından gedə bilərsiniz, bu, yeni başqanın kimliyindən asılıdır...

- Sözün düzü, bu barədə düşünmürəm. Mən “partiya başqanının kim olması çox önəmlidir” deyərkən bildirmək istəyirəm ki, öz məsuliyyətimi dərk edərək bu prosesdə ən düzgün qərarların qəbul edilməsinə qarışmaq, bu qərarların qəbul edilməsində fəal iştirak etmək niyyətindəyəm. Yəni mənim ifadəmi də həmin mənada qəbul etmək lazımdır. Hesab edirəm ki, bizlər, xüsusilə də partiya rəhbərliyinə daxil olan şəxslər daha çox məsuliyyət daşıyırlar və odur ki, biz o məsuliyyətimizi daha tez və dərindən dərk etməliyik. Şübhəsiz ki, bu mənada partiyanın növbəti qurultayı, başqanın seçilməsi məsələləri mənim üçün çox önəmli məsələlərdir.

- Müsavat Partiyası Divanındakı həmkarınız Vurğun Əyyub deyib ki, “Namizəd olmasam, digər bir namizədi dəstəkləyəcəyəm. Hələlik müdafiə edəcəyim namizədin adını çəkmək istəmirəm”. “Yeni Müsavat” qəzeti onun müdafiə edəcəyi namizədin Qubad İbadoğlu olduğunu yazıb. Doğrudanmı Vurğun Əyyub özü namizəd olmasa Sizi dəstəkləyəcək?

- Bu, qəzetin irəli sürdüyü bir versiyadır. Ola bilsin ki, bu versiya Vurğun bəylə bizim isti münasibətlərimizdən yaranıb. Əslində, biz bu məsələləri birgə müzakirə edərək qərar vermək niyyətindəyik. Şəxsən mən hesab edirəm ki, Müsavat Partiyasının başqanlığına ən layiqli namizədlərdən biri məhz Vurğun Əyyubdur. Həm təcrübəsinə, həm nüfuzuna, həm ictimai rəydəki mövqeyinə görə o, bu posta layiqdir. O cümlədən mən Arif bəyi, Arzu bəyi də başqanlığa haqqı daha çox olan şəxslər hesab edirəm. Müsavatda bu posta namizəd ola biləcək xeyli insan var. İstənilən halda bugünkü gündə onların hər birinin, xüsusilə də Arzu bəyin məsuliyyətli çıxışını başa düşür və narahatlığını anlayıram.

- Namizədliyinizi irəli sürəcəyiniz halda İsa Qəmbərlə də məsləhətləşəcəksinizmi?

- Mən namizədliyimi irəli sürərəmsə, bununla bağlı ilk növbədə partiyanın başqanı ilə, partiyanın qurucuları, onu bizə əmanət verənlərlə və partiyanın rəhbərliyi, hətta fikirlərinə hörmət etdiyim sıravi üzvləri ilə məsləhətləşib müzakirələr aparmaq fikrindəyəm. Çünki partiyamız indi bir mərhələdən digərinə keçid dövrünü yaşayır. Qurultay partiyaya yeni güc, enerji gətirməli və yaxud bunun üçün əsaslar yaratmalıdır ki, partiyamız 2013-cü il prezident seçkilərindəki namizədini biz az da güclənmiş Müsavat Partiyası adından müdafiə edə bilsin. Qurultayda partiyamızın prezidentliyə namizədi ilə bağlı hansısa qərar olacaqsa, yəqin ki, həmin qərarın qəbul edilməsində iştirak edən şəxslərdən biri mən olacağam.

- Siz özünüzü partiya başqanlığına namizədlikdə adı hallandırılan Arif Hacılı və Arzu Səmədbəyli ilə müqayisədə nə qədər şanslı sayırsınız?

- Hər iki şəxsin, həm də Vurğun bəyin partiyadakı rolunu və xidmətlərini yüksək qiymətləndirirəm. Biz onlarla silahdaşıq. Onlar istənilən siyasətçi üçün kifayət qədər güclü rəqiblərdir. Mən namizədliyimi versəm, bunları nəzərə alıb qərar qəbul edəcəyəm.

- İsa Qəmbər 2013-cü il prezident seçkiləri zamanı Müsavat başqanı olmadan prezidentliyə namizəd kimi irəli sürülə bilərmi?

- Bunun biri digərinə mane olmur. İsa bəy Müsavat başqanı kimi də prezidentliyə namizəd ola bilər, partiyanın sıravi üzvü kimi də. Bu şansa və haqqa istənilən halda o, daha çox malikdir. Mən əminəm ki, İsa bəy nəinki Müsavat Partiyası, həm də ümumilikdə demokratik düşərgə tərəfindən dəstəklənəcək. Amma bu barədə son qərarı partiyanın qurultayı verəcək. Odur ki, qurultayın qərarına hörmətlə yanaşacağam. Amma istənilən halda mövqeyimi bildirməliyəm ki, 2013-cü il seçkilərində ən layiqli namizədimiz İsa Qəmbərdir.

- Deməli, mart ayında keçiriləcək qurultayda həm də Müsavat Partiyasının prezidentliyə namizədi müəyyənləşəcək?

- Bu, istisna olunmur və gözləniləndir. Çünki növbəti ildə prezident seçkiləridir. Mən partiyamızın alternativsiz namizədinin İsa Qəmbər olacağına şübhə etmirəm.

- İsa Qəmbər müxalifətin vahid namizədi ola bilər, yoxsa AXCP sədri Əli Kərimlini ona rəqib sayırsınız?

- Bu müzakirələr hələ başlamayıb. Amma bəri başdan deyim ki, İsa bəy növbəti prezident seçkiləri üçün müxalifətin ən layiqli, ən şanslı namizədidir.

Müsavat_Partiya