Daxili siyasət

Ana səhifə

Daxili siyasət

Baş Dövlət Yol Polisi İdarəsində geniş əməliyyat müşavirəsi keçirilib

17 yanvar 2012 19:05 (UTC +04:00)

Daxili İşlər Nazirliyin mətbuat xidmətindən APA-ya verilən xəbərə görə, tədbirdə çıxış edən Azərbaycanın daxili işlər naziri, general-polkovnik Ramil Usubov 2011-ci ildə dövlət yol polisinin maddi-texniki bazasının möhkəmləndirilməsi, sosial müdafiəsinin daha da gücləndirilməsi, xidməti fəaliyyətin təkmilləşdirilməsi istiqamətində önəmli addımların atıldığını barədə danışıb. O bildirib ki, 2011 ildə ölkə prezidentinin müvafiq fərmanları ilə DYP xidməti əməkdaşlarının aylıq vəzifə maaşları orta hesabla 50 faiz artırılıb, ölkə ərazisinə idxal edilən nəqliyyat vasitələrinin gömrük rəsmiləşdirilməsi və uçota alınması ilə bağlı işlərin “bir pəncərə” prinsipi əsasında həyata keçirilməsinə başlanılıb, ümumiyyətlə, yol hərəkəti təhlükəsizliyinin təmini ilə bağlı 13 qanun, fərman və sərəncam imzalanıb.

Hesabat dövründə görülmüş işlər və qarşıda duran vəzifələr barədə danışan Baş Dövlət Yol Polisi İdarəsinin rəisi, polis general-mayoru Ramiz Zeynalov bildirib ki, DYP-nin maddi texniki bazası son illər ərzində tamamilə yeniləşərək müasirləşib, xidmətin «elektron hökumət» dövlət proqramına uyğun qurulması, qayda pozuntularının müasir texniki vasitələrlə aşkarlanması və digər istiqamətlərdə uğurlu islahatlar aparılıb.

Baş İdarədə mərkəzləşdirilmiş elektron məlumat bazasının yaradılması respublikanın istənilən ərazisindən nəqliyyat vasitələri, onların sahibləri və sürücüləri barədə operativ məlumat almaq imkanı verir.

Qeyd olunub ki, 2011-ci il ərzində yol hərəkətinə nəzarət prosesində DYP əməkdaşları 892 min 409 yol hərəkəti qayda pozuntusu, o cümlədən nəqliyyat vasitələrinin sərxoş sürücülər tərəfindən idarə edilməsi üzrə 18 min 233, müəyyən olunmuş sürət həddinin aşılması üzrə 100 min 755, ötmə qaydalarının pozulması üzrə 13 min 940 fakt aşkar ediblər.

Hərəkətin təhlükəsizliyinin təmini ilə yanaşı yollarda baş vermiş digər cinayət hallarına qarşı mübarizə sahəsində də bir sıra işlər görülmüş, DYP əməkdaşları tərəfindən 12 ədəd Kalaşnikov avtomatı, 4 tüfəng, 6 tapança, 1 əl qumbarası, 1429 ədəd müxtəlif çaplı patron aşkar edilərək istintaq orqanlarına təhvil verilib. Polisin digər xidmətləri ilə birgə 36 fakt üzrə 43 kiloqramdan çox narkotik maddə aşkar olunub. 2011-ci il ərzində Baş İdarəyə 181 nəqliyyat vasitəsinin oğurlanması və qaçırılması barədə məlumat daxil olub ki, onlardan da 168-i tapılıb.

Bildirilib ki, ötən il 73 min 337 avtomobil ilkin qeydiyyata alınıb, respublikanın avtomobil parkının sayı 1 milyon 49 mindən artıq olub. Qeydiyyat-imtahan hissələrində avtonəqliyyat vasitələrinin qeydiyyat hərəkətləri zamanı məlumat bazası ilə axtarışda olan 65 nəfər və 258 avtomobil saxlanılıb, habelə aqreqat nömrələrinin qeydiyyat sənədləri ilə uyğunsuzluğu üzrə 412 fakt aşkar olunaraq materiallar araşdırılması üçün təhqiqat orqanlarına göndərilib.

Avtomobillərin texniki vəziyyətinə nəzarətin artırılması, texniki baxışın keyfiyyətinin yüksəldilməsi məqsədilə 15 cərgəlik ən müasir tələblərə cavab verən yeni diaqnostika stansiyası istifadəyə verilib. Cari ildən qanunverciliyin tələblərinə uyğun olaraq texniki baxışın yalnız tam şəkildə müvafiq şərait yaradılmış xüsusi məntəqələrdə keçirilməsi nəqliyyat vasitələrinin nasaz vəziyyətdə istismar olunması hallarının qarşısının alınmasına xidmət edəcək və şəffaflığın təmin olunmasına, neqativ halların aradan qalxmasına şərait yaradacaq.

Nazirliyin rəhbərliyinin tapşırığna müvafiq olaraq, hərəkətin təhlükəsizliyinin təbliği məqsədilə kütləvi informasiya vasitələrinin, xüsusilə televiziyanın köməyindən istifadə etməklə əhali arasında geniş izahat işləri aparılıb, qəza hallarının baş verməsinə səbəb olan qayda pozuntularının izahına dair videoanimasiyalar və süjetlər televiziya kanallarında mütəmadi yayımlanıb, Bakı şəhərinin yol ayrıclarında quraşdırılan videokameralardan istifadə olunmaqla mövcud hərəkət sıxlıqları, qeydə alınan yol-nəqliyyat hadisələri və qayda pozuntuları barədə əhaliyə gündəlik məlumatların verilməsi davam etdirilib.

2011 ildə yol-nəqliyyat hadisələrinin, bu zaman ölən və yaralananlarının sayının artması da qeydə alınıb. Belə ki, il ərzində ölkə ərazisində 2890 yol-nəqliyyat hadisəsi baş verib, nəticədə 1016 nəfər həlak olub, 3031 nəfər yaralanıb. 2010-cu illə müqayisədə yol-nəqliyyat hadisələrinin sayı 169 (6,2%), həlak olanların sayı 91 nəfər (9,8%), yaralananların sayı isə 160 nəfər (5,6%) artıb.

Respublika üzrə qeydə alınan yol-nəqliyyat hadisələrinin 93,6% (2707) sürücülərin yol hərəkəti qaydalarını pozmaları, o cümlədən 45% (1302) nəqliyyat vasitələrinin yüksək sürətlə idarə olunması, 23,2%(671) ötmə və qarşıdan gələn nəqliyyatın yoluna çıxma, 3% (88) nəqliyyat vasitələrinin sərxoş vəziyyətdə idarə olunması səbəbindən baş verib. Hadisələrin 38,7% (1119) piyadaların vurulması təşkil edib, nəticədə 392 piyada həlak olub, 803-ü yaralanıb.

Bildirilib ki, DYP əməkdaşlarının sosial problemlərin həllinin dövlətin daim nəzarətdə saxlanmasına, müvafiq fərmanla cərimələrdən toplanmış maliyyə vəsaitinin 25% aylıq vəzifə maaşlarına əlavə edilməsinə baxmayaraq hələ də bəzi əməkdaşlar tərəfindən xidmətdə neqativ hərəkətlərə yol verilib. Ötən il bu və digər nöqsanlara görə 697 əməkdaş cəzalandırılıb, 39 nəfər daxili işlər orqanlarında xidmətdən xaric edilib, 20 əməkdaş isə tutduğu vəzifədən azad olunub.

Müşavirəyə yekun vuran daxili işlər naziri Ramil Usubov Dövlət Yol Polisi xidmətinin hərəkətin təhlükəsizliyinin təmin olunmasında mühüm funksiyalar həyata keçirdiyini, şəxsi heyətin bu yöndə qarşıya qoyulan vəzifələrin öhdəsindən ümumən gəldiyini bildirib, lakin bəzi nöqsan və çatışmazlıqların da olduğunu xatırladıb, onların aradan qaldırılması üçün müvafiq tapşırıq və tövsiyələrini verib.