Daxili siyasət

Ana səhifə

Daxili siyasət

Nazirlər Kabineti Azərbaycan və Türkiyə arasında İzmirdə imzalanmış sənədlərin müddəalarının həyata keçirilməsi haqqında qərar qəbul edib

20 yanvar 2012 09:11 (UTC +04:00)

Bakı. Rəşad Süleymanov – APA. Nazirlər Kabineti Azərbaycan və Türkiyə hökumətləri arasında 2011-ci il oktyabrın 25-də İzmir şəhərində imzalanmış sənədlərin müddəalarının həyata keçirilməsi haqqında qərar qəbul edib. Bu barədə APA-ya Nazirlər Kabinetindən məlumat verilib.

Qərar Azərbaycan və Türkiyə hökumətləri arasında mətbuat və informasiya sahələrində əməkdaşlıq haqqında Protokola, Azərbaycan Respublikası hökuməti və Türkiyə Respublikası hökuməti arasında ailə, qadın və uşaq məsələləri üzrə siyasət sahəsində Əməkdaşlıq Protokoluna, Azərbaycan Respublikası hökuməti və Türkiyə Respublikası hökuməti arasında polis təhsili sahəsində əməkdaşlıq haqqında Protokola, Azərbaycan Respublikası hökuməti və Türkiyə Respublikası hökuməti arasında meteorologiya sahəsində əməkdaşlığa dair Anlaşma Memorandumuna və Azərbaycan Respublikası hökuməti və Türkiyə Respublikası hökuməti arasında meşə təsərrüfatı sahəsində əməkdaşlığa dair Anlaşma Memorandumuna şamil edilib.

Azərbaycan və Türkiyə hökumətləri arasında polis təhsili sahəsində əməkdaşlıq haqqında Protokola əsasən tərəflər arasında polis vəzifələrinə namizədlərin hazırlanması məqsədilə təlim proqramları hazırlanacaq. Türkiyə Polis Akademiyasının təhlükəsizlik elmləri fakültəsinə və Təhlükəsizlik Elmləri İnstitutuna hər il aşağıda qeyd olunan sahə, say və şərtlər üzrə tələbələrin qəbulu həyata keçiriləcək. Bakalavr dərəcəsi üzrə təhlükəsizlik elmləri fakültəsinə hər il 5 azərbaycanlı tələbənin qəbulu sənəddə əksini tapıb. Buna əlavə olaraq fakültənin Beynəlxalq təhlükəsizlik elmləri kafedrasına hər il fakültə tərəfindən müəyyən ediləcək xüsusi şərtlər və kvota daxilində də tələbə qəbul ediləcək. Təhlükəsizlik Elmləri İnstitutu tərəfindən təklif edilən magistr dərəcəsi proqramı üçün hər il 3, doktorluq dərəcəsi proqramı üçünsə 2 namizəd qəbul ediləcək. Bu protokola əsasən tərəflər üçüncü ölkələr üçün də birgə təlim tədbirləri həyata keçirəcəklər.