Daxili siyasət

Ana səhifə

Daxili siyasət

BAXCP və AMİP Fransa Senatının qəbul etdiyi qanunu pisləyiblər

24 yanvar 2012 11:47 (UTC +04:00)

Bakı-APA. "Fransa Senatının qondarma "erməni soyqırımı"nı inkar edənlərin cəzalandırılmasını nəzərdə tutan qanunu qəbul etməsi Qafqazda düşmənçiliyin və qarşıdurmanın gücləndirilməsinə xidmət edir". APA-nın məlumatına görə, Bütöv Azərbaycan Xalq Cəbhəsi Partiyasının sədri, millət vəkili Qüdrət Həsənquliyev partiyanın mətbuat xidmətinə açıqlamasında belə deyib.
BAXCP sədri bildirib ki, Azərbaycan və Türkiyənin kəskin etirazlarına baxmayaraq, belə bir qanunun qəbul edilməsi onu göstərir ki, Rusiya və İrandan sonra daha bir dövlət öz maraqları naminə Ermənistandan alət kimi istifadə etmək niyyətindədir: "Bu qanunun qəbul edilməsilə Fransa ATƏT-in Minsk qrupunun həmsədrlərindən biri kimi Dağlıq Qarabağ münaqişəsinin tənzimlənməsi prosesindəki vasitəçilik missiyası başa vurub. Fransa vasitəçi kimi ona verilən mandat üzərindəki hüquqi və mənəvi haqqını itirib. Buna görə də, Azərbaycan dərhal Fransanın Minsk qrupunun həmsədrliyindən uzaqlaşdırılması üçün müvafiq qərarlar qəbul etməli, Fransa ilə bütün istiqamətlərdə əlaqələrinə yenidən baxmalıdır. Azərbaycan, eyni zamanda BMT Təhlükəsizlik Şurasının üzvü kimi Fransa Senatının qəbul etdiyi qanunun insan hüquq və azadlıqlarının təməl prinsiplərinə, düşüncə və söz azadlığına zidd olduğunu əsas götürərək, beynəlxalq birliyi bu qanunun ləğvi üçün hərəkətə keçməyə çağırmalıdır".

AMİP Siyasi Şurasının növbədənkənar iclasın da Fransa Senatında qəbul olunan qanun müzakirə mövzusu olub. Siyasi Şurası bununla bağlı bəyanat qəbul edib. Bəyanatda Türk millətinin tarixdə heç bir millətə qarşı soyqırımı tətbiq etmədiyi vurğulanmaqla, qəbul olunmuş qanun seçkilər ərəfəsində Fransada yaşayan ermənilərin səsini qazanmaq üçün Sarkozi hakimiyyəti tərəfindən aparılan saxtakarlıq və riyakarlıq oyunu kimi qiymətləndirilib.

“Bu qanunun qəbulu ilə Fransa Dağlıq Qarabağ probleminin həllində hansı mövqedən çıxış etdiyini, ATƏT-in Minsk Qrupunun həmsədri kimi açıq şəkildə Ermənistanı dəstəklədiyini bir daha göstərib”.

Bəyanatda həmçinin heç bir beynəlxalq qurum tərəfindən tanınmayan qondarma “erməni soyqırımı” ilə bağlı Fransa Senatında qəbul edilən qanunun Beynəlxalq hüquqla təsbit olunmuş demokratiya prinsipləri və fundamental insan azadlıqları ilə ziddiyyət təşkil etdiyi bildirilib, Fransanın bu davranışla Türkiyəyə və bütün Türk dünyasına qarşı təzyiq etməsi əxlaqa və beynəlxalq hüquq normalarına uyğun gəlməyən hal kimi qiymətləndirilərək kəskin şəkildə pislənilib.