Daxili siyasət

Ana səhifə

Daxili siyasət

Əhməd Oruc: “İctimai Palata siyasi meydanda qalmasını təmin etmək üçün hamıya şər atır”

02 fevral 2012 10:28 (UTC +04:00)

Bakı. Ramil Məmmədli – APA. “Hesab edirəm ki, bütün bu lüzumsuz çəkişmələri kənara qoyub real əməkdaşlıq istiqamətində düşünmək lazımdır. İctimai Palata ictimai təşkilatların fəaliyyətini əlaqələndirən qurum kimi gələcəkdə bu və ya digər proseslərdə bizimlə çiyin-çiyinə iştirak edə bilər”.

Bu açıqlamanı APA-ya Demokratik Cəmiyyət Uğrunda Müqavimət Hərəkatının həmtəsisçisi, Azadlıq Partiyasının sədri Əhməd Oruc verib.

O deyib ki, İctimai Palatada təmsil olunan partiyalar hərəkatın təsis olunmasından sonra ən çox hücumu Rəsul Quliyevə qarşı istiqamətləndiriblər: “Bunu da onunla əsaslandırırlar ki, Rəsul Quliyev iqtidarın hakimiyyətə gəlməsinə və sonradan möhkəmlənməsinə kömək edib. Ancaq AXCP-Müsavat unudur ki, 2003-cü və 2005-ci illərdə Rəsul Quliyevlə əməkdaşlıq edirdilər. Həmin partiya liderləri boğazlarına narıncı xalta taxıb, Rəsul Quliyevi qarşılamaq üçün Bakı hava limanının yollarına tökülmüşdülər. İndi özlərinin siyasi meydanda qalmasını təmin etmək üçün hamıya şər atırlar. Bu düzgün deyil. Hesab edirik ki, Azərbaycanda hansısa dəyişikliklər Demokratik Cəmiyyət Uğrunda Müqavimət Hərəkatı formatında həyata keçə bilər”.

Ə. Orucun fikrincə, artıq cəmiyyətdə AXCP və Müsavat Partiyasının limiti çoxdan tüklənib: “Keçirdikləri aksiyalara da cəmiyyətdən dəstək gəlmədi. Yalnız partiya üzvləri dən başqa aksiyalara heç kim qatılmadı. Bu siyasi xətt iflasa məhkumdur. Onlar səhv etdiklərini yaxın vaxtlarda başa düşəcəklər”.

İctimai Palatanın katibi, Müsavat Partiyası başqanının müavini Gülağa Aslanlı Əhməd Orucun dedikləri ilə razılaşmadığını və onun fikirlərini təhqir kimi qəbul etdiyini deyib: “Əhməd Oruc siyasətdə qalmaq üçün müxtəlif təşkilatları təhqir etməklə məşğuldur. İctimai Palatanın fəaliyyətinə həqarət etməklə, keçirilən aksiyaları aşağılamaqla hakimiyyətə yararlana biləcəyini göstərir. Əhməd Oruc siyasətdə bir özü, bir portfeli olan partiya sədri kimi tanınır. Onun partiyası Müsavat Partiyasının hansısa rayon təşkilatının gücündə də deyil”.

G. Aslanlı Açıq Cəmiyyət Partiyasının lideri Rəsul Quliyevə qarşı təmsil olunduğu təşkilatlar tərəfindən hansısa təzyiqlərin olması haqqında deyilənləri də əsassız hesab edib: “Bir fakt göstərsin ki, hansı halda biz Rəsul Quliyevin Azərbaycana gəlməsinə mane olmuşuq və ya ona qısqanclıqla yanaşmışıq. Müsavat Partiyası və AXCP dəfələrlə Rəsul Quliyevin Azərbaycana qayıtmasına kömək göstəriblər. Hətta İsa Qəmbər Ukraynaya gedərək Rəsul Quliyevin Azərbaycana gəlməsinə yardımçı olmaq istədi. Hazırkı halda isə onun üzərinə getmək fikrimiz yoxdur”.

G. Aslanlı Demokratik Cəmiyyət Uğrunda Müqavimət Hərəkatının rəhbərlərinə də ismarış göndərib: “Əgər bu adda fəaliyyət göstərən qurumun rəhbərlərindən kimsə digər müxalifət partiyasına qarşı təhqiramiz ifadələr səsləndirəcəksə, bu onlara baş ucalığı və uğur gətirməyəcək. Əgər Əhməd Oruc düşünürsə ki, ancaq onun təmsil olunduğu təşkilat Azərbaycanda dəyişiklik edə bilər, buyurub, çıxsınlar meydana və mitinq elan etsinlər, görək onların aksiyalarına nə qədər adam gəlir. Burada əsas diqqəti hakimiyyətə yox, dəyişikliklər istəyən İctimai Palataya yönəltmək düzgün deyil”.