Daxili siyasət

Ana səhifə

Daxili siyasət

YAP İdarə Heyətinin iclası keçirilib

02 fevral 2012 12:29 (UTC +04:00)

Bakı. Ramil Məmmədli-APA. Yeni Azərbaycan Partiyasının (YAP) İdarə Heyətinin iclası keçirilib.

APA-nın YAP-ın rəsmi internet saytına istinadən verdiyi məlumata görə, yığıncaqda YAP sədrinin müavini – icra katibi Əli Əhmədov iclasın gündəliyində duran məsələlər ətrafında çıxış edib. İclasda YAP-ın 2011-ci ilin hesabatı, ötən ilə dair maliyyə hesabatı, 2012-ci ilin birinci yarım illiyinə dair tərtib edilən iş planı geniş və ətraflı müzakirə olunub.

İclasda qeyd olunub ki, ötən 2011-ci ildə partiya təşkilatlanma, ideoloji-təbliğat, gənclər siyasəti və beynəlxalq əlaqələrini genişləndirilməsi baxımından çox mühüm uğurlar qazanıb. 2012-ci il yanvarın 1-nə olan məlumata görə, YAP üzvlərinin sayı 556 min nəfərdən yuxarı olub, partiyanın sıralarına 34 mindən çox yeni üzv qəbul edilib ki, onların da 60 faizə qədəri gənclərdir.

İdarə Heyətinin iclasında partiyanın 2011-ci il maliyyə hesabatı təsdiq edilib. Yığıncaqda bildirilib ki, ötən 2011-ci ildə partiya üzvlük haqlarından təşkilatın büdcəsinə 4 mln. 711 min 974 manat daxil olub. Daxil olan vəsaitin 4 mln. 611 min 323 manatı YAP-ın rayon (şəhər) təşkilatlarının və İcra Katibliyinin xərclər smetasını təşkil edib. Xərclənən vəsaitin 2 mln. 459 min manatı əmək haqlarının ödənilməsinə, 687 min manatı müxtəlif xarakterli partiya tədbirlərinin maliyyələşdirilməsinə, 196 min manatı ezamiyyə xərclərinə, 326 min manatı nəqliyyat vasitələri və inventarların alınmasına, 170 min manatı cari təmir işlərinə, 178 min manatı təsərrüfat xərclərinə, 61 min manatı çap işlərinə, qalan hissəsi isə kommunal, icarə haqqı, rabitə xərcləri, bank xidməti və s. istiqamətlərə sərf edilib.

İdarə Heyətinin iclasında partiya həyatına aid bir sıra məsələlər müzakirə edilib və müvafiq qərarlar qəbul olunub.