Daxili siyasət

Ana səhifə

Daxili siyasət

YAP-ın dialoq təklifinə Müsavat “hə”, AXCP isə “yox” deyib

10 fevral 2012 11:08 (UTC +04:00)

Bakı. Pərvin Abbasov-APA. “YAP funksioneri Siyavuş Novruzovun təklif etdiyi maliyyə hesabatı məsələsində dialoq keçirilməsi əslində, Azərbaycan üçün milli əhəmiyyətli məsələsi deyil. Biz istənilən mövzuda dialoq aparmağa hazırıq”. Bu açıqlamanı APA-ya Müsavat Partiyası başqanının müavini Gülağa Aslanlı hakim Yeni Azərbaycan Partiyası (YAP) icra katibinin müavini Siyavuş Novruzovun siyasi partiyaların maliyyələşməsi mövzusunda dialoq aparılması təklifinə münasibət bildirərkən deyib. O, Müsavat Partiyasının hakimiyyət tərəfindən təklif edilən istənilən mövzuda və istənilən səviyyədə dialoq aparmağa hazır olduğunu söyləyib: “İstənilən məsələnin müzakirəsində öz iştirakımızın təmin olunmasını istəyirik”.

AXCP sədrinin müavini Fuad Qəhrəmanlı isə YAP-la partiyaların maliyyə hesabatı mövzusunda dialoq aparılmasına isti yanaşmır. O, APA-ya açıqlamasında deyib ki, partiyalar arasında dialoq üçün bu cür mövzu təklif olunması primitivlik və yanlışdır: “Çünki dialoqun predmeti ölkədə demokratik islahatların keçirilməsi ilə bağlı ola bilər. Dialoq özlüyündə bir siyasi aksiya kimi hakimiyyət və müxalifət arasında birgə səylər tələb edən problemlərin həlli ilə bağlı ortaq məxrəc anlayışını daşıyır. Dialoq siyasi məhbusların azad olunması, sərbəst toplaşma azadlığının təmin edilməsi, ölkədə seçkilərin demokratik keçirilməsi, iqtisadi, siyasi, hüquqi sahədə islahatların aparılması və s. mövzularda ola bilər”.

F. Qəhrəmanlı deyib ki, hətta YAP-ın açıqladığı maliyyə hesabatı saxtadır, bu səbəbdən də hakim partiya bu mövzuda da danışa bilməz.

Xatırladaq ki, S. Novruzov YAP-ın illik hesabatının, o cümlədən maliyyə hesabatının açıqladığını xatırladaraq, digər partiyaların da analoji hesabatları açıqlamalı olduğunu vurğulayıb: “Biz 20 ildir hesabatlarımızı açıqlamaqla digərlərinə nümunə göstəririk. Amma müxalifət partiyaları bu cür hesabat açıqlamırlar. Açıqlayın, görək hansı mənbədən maliyyələşirsiniz? Əlbəttə, onlar qaranlıq mənbələrdən maliyyələşirlər, ona görə də hesabat verə bilmirlər. Gəlsinlər, siyasi partiyaların maliyyələşməsi mövzusunda danışaq, dialoq aparaq. Biz Azərbaycanın taleyüklü məsələləri ilə bağlı daim dialoq aparmağa hazır olduğumuzu bəyan etmişik. Siyasi partiyalar bir-biri ilə düşmənçilik aparmalı deyil ki... Amma onların yalnız bir fikri var ki, Azərbaycanda qarışıqlıq düşsün, gərginlik yaransın və hakimiyyətə gəlsinlər”.