Daxili siyasət

Ana səhifə

Daxili siyasət

Azərbaycan Milli Məclisinin komitə sədri Ədliyyə Nazirliyi Bələdiyyələrlə İş Mərkəzinin fəaliyyətini kəskin tənqid edib

14 fevral 2012 10:37 (UTC +04:00)

Bakı. Pərvin Abbasov – APA. “Azərbaycanda bələdiyyələrin hüquqları pozulur. Lakin Ədliyyə Nazirliyinin Bələdiyyələrlə İş Mərkəzi bu pozulan hüquqlarla bağlı heç bir iş görmür, əslində bu qurumun sözü də keçmir”. APA-nın xəbərinə görə, bunu Milli Məclisin (MM) iclasında MM-in Regional siyasət komitəsinin sədri Arif Rəhimzadə deyib.

A. Rəhimzadə bildirib ki, Ədliyyə Nazirliyi (ƏN) isə Bələdiyyələrlə İş Mərkəzini yaratmaqla işini bitmiş sayıb: “Nazirliyin Bələdiyyələrlə İş Mərkəzi yalnız bələdiyyələri yoxlamaqla, onları cəzalandırmaqla məşğuldur”.

A. Rəhimzadə, həmçinin deyib ki, Azərbaycanda bələdiyyələrin 1/3-nə, təxminən 600-ünə torpaq üzərində mülkiyyət hüququ verilməyib.

Qeyd edək ki, hazırda parlamentin iclasında bələdiyyələrin fəaliyyətinə inzibati nəzarəti həyata keçirən orqanın - Ədliyyə Nazirliyinin Bələdiyyələrlə İş Mərkəzinin illik məruzəsi dinlənilir. Məruzəni ədliyyə nazirinin müavini Vilayət Zahirov təqdim edib.

A. Rəhimzadə nazir müavinin səsləndirdiyi bəzi rəqəmlərə ironik reaksiya verib.