Daxili siyasət

Ana səhifə

Daxili siyasət

Prezident İlham Əliyev: “Azərbaycan öz dahi şəxsiyyətlərinin xatirəsinə böyük hörmətlə yanaşır” - FOTOSESSİYA

Prezident İlham Əliyev: “Azərbaycan öz dahi şəxsiyyətlərinin xatirəsinə böyük hörmətlə yanaşır” - <font color=red>FOTOSESSİYA</font>

21 fevral 2012 20:29 (UTC +04:00)

APA-nın verdiyi xəbərə görə, bu barədə prezident İlham Əliyev Bakıda xalq qəhrəmanı Koroğlunun xatirəsinə ucaldılmış abidənin açılış mərasimindəki çıxışında deyib.

Prezident bildirib ki, müxtəlif dövrlərdə Azərbaycanın böyük sənətkarları “Koroğlu” mövzusuna müraciət ediblər. Dahi bəstəkar Üzeyir Hacıbəylinin 1930-cu illərdə yazdığı “Koroğlu” operası bu gün də yaşayır və əbədi yaşayacaq. Bütün təntənəli mərasimlərdə “Koroğlu” operasının uvertürası səslənir. Bu, dövlət himnimizlə bərabər Azərbaycan xalqının ayrılmaz böyük dəyəri kimi bu gün də yaşayır.
Prezidentin fikrincə, gənc nəslin tərbiyə edilməsində “Koroğlu” dastanı çox mühüm bir vasitədir. “Çünki gənc nəslimiz vətənpərvərlik ruhunda böyüməli, tərbiyə almalıdır. Müstəqil Azərbaycanın vətəndaşları öz Vətənini, xalqını sevməlidirlər. Koroğlu xalq içərisindən çıxmış, xalq üçün yaşamış gözəl insan, böyük sərkərdə idi. Koroğlu, eyni zamanda, istedadlı insan idi - həm şair, həm aşıq idi. Bir daha demək istəyirəm ki, Azərbaycan xalqının ən gözəl xüsusiyyətləri onda var idi və bizim gənclərimiz keçmişimizdə olan müsbət obrazları da bilməlidirlər, yaxından, dərindən tanımalıdırlar”. Azərbaycanın zəngin tarixi olduğunu bildirən prezident deyib ki, Koroğlu abidəsinin ucaldılması bir tərəfdən tarixi ədaləti əks etdirir, digər tərəfdən Koroğlu abidəsi bir daha Azərbaycan xalqının nə qədər böyük xalq olduğunu əyani şəkildə göstərir.

O vurğulayıb ki, Azərbaycan öz dahi şəxsiyyətlərinin xatirəsinə böyük hörmətlə yanaşır. 2011-ci ildə Bakıda görkəmli şəxsiyyətlərin- Zivərbəy Əhmədbəyovun və Fikrət Əmirovun abidələri ucaldılıb. Yaxın gələcəkdə Bakıda Babəkin, Qara Qarayevin, Bülbülün abidələri ucaldılacaq. Artıq müvafiq göstərişlər verilib.

”Mən çox şadam ki, Azərbaycan gəncləri vətənpərvərdirlər, Vətənə bağlıdırlar, Vətəni sevirlər. Bizim vətəndaşlar haqlı olaraq qürur hissi keçirirlər ki, biz hamımız Azərbaycan vətəndaşıyıq”-deyə, ölkə başçısı bildirib.

Dövlət başçısının sözlərinə görə, iyirmi il ərzində ölkə böyük və şərəfli yol keçib, bütün sahələrdə böyük uğurlara nail olub: “Bu gün ölkəmizdə hər bir sahədə olduğu kimi, milli mənəvi sahədə də dirçəliş, inkişaf var. Biz güclü, müasir dövlət qururuq. Ancaq ənənələrimizə, tariximizə, keçmişimizə çox bağlıyıq. Dünyada qloballaşma prosesləri gedir, istər-istəməz bizə də təsir edir. Yəni bu, heç bir ölkədən yan keçə bilməz. Xüsusilə, bu dövrdə milli dəyərlərə diqqət daha da böyük olmalıdır. İnsanlar milli ruhda tərbiyə olunmalıdırlar. Öz Vətəninə, öz keçmişinə, tarixinə, dahi şəxsiyyətlərinə hörmətlə yanaşmalıdırlar. Mən çox şadam ki, bugünkü Azərbaycan reallıqlarını bu amillər müəyyən edir. Bizi bəzi başqa ölkələrdən fərqləndirən məhz odur ki, Azərbaycan dövləti güclü milli təməl üzərində qurulub. Eyni zamanda, Azərbaycanda yaşayan bütün millətlərin, bütün dinlərin nümayəndələri ölkəmizin dəyərli vətəndaşlarıdırlar və Azərbaycanın təcrübəsi bu baxımdan diqqətə layiqdir və böyük maraq doğurur”.

Bakıda böyük quruculuq işləri aparıldığını deyən prezident vurğulayıb ki, bütün parklar, bağlar yenidən qurulur, abadlaşır: “İnsanlar üçün gözəl istirahət yerləri yaradılır. Bakı doğrudan da indi dünyanın ən gözəl şəhərlərindən biridir. Bakının tarixi gözəlliyi var. Tarixi, qədim binalar şəhərimizə gözəllik verir. Eyni zamanda, Bakının müasir meqapolisə çevrilməsi prosesi də uğurla gedir. Bu iki istiqamət arasında heç bir ziddiyyət olmamalıdır və yoxdur. Həm müasir binalar, həm qədim Bakı bir-birini tamamlamalıdır və tamamlayır. Şəhərimizin gözəlləşməsi hər bir Bakı sakini, hər bir Azərbaycan vətəndaşı üçün çox vacib olan məsələdir. Bakıya gələn hər bir qonaq şəhərin gözəlliyinə heyran olur. Bakı da bizim böyük, milli sərvətimizdir”.

Prezident Koroğlu abidəsinin ucaldılmasının böyük məna daşıdığını deyib: “Bu, həm tarixi şəxsiyyətə hörmətimizin əlamətidir, həm keçmişimizə olan münasibətdir, həm də Koroğlunun etdiyi fədakarlığa görə Azərbaycan xalqının qiymətidir. Bu gözəl əsər, əminəm ki, bütün Azərbaycan xalqını sevindirəcəkdir. Koroğlu abidəsi məhz belə olmalı idi. Gözəl, möhtəşəm, qürurlu və əzəmətli”.

Prezident əsərin müəllifinə, görkəmli heykəltəraş Tokay Məmmədova da minnətdarlığını bildirib.