Daxili siyasət

Ana səhifə

Daxili siyasət

KXCP sədri: “Biz razılaşdırılmış aksiyaların keçirilməsinin tərəfdarıyıq”

28 fevral 2012 11:19 (UTC +04:00)

Bakı. Ramil Məmmədli-APA. “Demokratik Cəmiyyət Uğrunda Müqavimət Hərəkatı kütləvi aksiyalarla bağlı müzakirələrə başlayıb”.

Hərəkatın İdarə Heyətinin üzvü, Klassik Xalq Cəbhəsi Partiyasının (KXCP) sədri Mirmahmud Mirəlioğlu bildirib ki, hərəkatın İdarə Heyətində bu məsələ müzakirə olunub və iki gündən sonra da növbəti dəfə bu məsələyə dair məsləhətləşmə aparılacaq: “Müzakirələrdə etiraz aksiyalarının konkret hədəfi və şüarları, əhatə dairəsi ciddi müzakirə olunur. Ona görə də müzakirələr hələ bitməyib və davam edəcək”.

“Aksiya keçirməklə bağlı hərəkat daxilində razılığın əldə olunmasını qarşısını alan məqam nədir?” sualını cavablandıran M. Mirəlioğlu deyib ki, burada müzakirələr razılıq və ya narazılıqla bağlı deyil: “Hesab edirik ki, məsləhətləşmələr ətraflı olmalıdır. Təbii ki, ilk növbədə kütləvi aksiyalara başlayan zaman acı təcrübələr və keçdiyimiz yol nəzərə alınmalıdır. Biz ötən ildə də, bu il də razılaşdırılmış aksiyaların keçirilməsinin tərəfdarı olmuşuq. Aksiyalar razılaşdırılmamış olanda uzun müddət bu tədbirin yaratdığı nəticələri aradan qaldırmaqla məşğul oluruq. Artıq bir ildir siyasi partiyaların çoxu qüvvələrini həmin aksiyalarda həbs olunanların azadlığa buraxılmasına sərf edirlər. Ona görə də razılaşdırılmış aksiyaların keçirilməsinin tərəfdarıyıq. Mövqeyimiz belədir və bunun necə olacağını isə zaman göstərəcək”.

M. Mirəlioğlu aksiyaların keçiriləcəyi məkanın onlar üçün elə də əhəmiyyət daşımadığını da söyləyib: “Aksiyalar kütləvi hal aldıqdan sonra növbəti kütləvi tədbirin harada olmasını artıq aksiya özü müəyyənləşdirir. Belə bir təcrübəni keçmişik”.