Daxili siyasət

Ana səhifə

Daxili siyasət

Prezident İlham Əliyev: “Bakının tarixi gözəlliyi bu gün müasir infrastruktur layihələrinin tamamlanması ilə zənginləşdirilir”

19 mart 2012 20:32 (UTC +04:00)

APA-nın verdiyi xəbərə görə, bunu Azərbaycan prezidenti İlham Əliyev Bakıda Novruz bayramı münasibətilə ümumxalq şənliyindəki çıxışında deyib.
Prezident bildirib ki, müstəqil dövlət kimi Azərbaycan yalnız inkişaf yolu ilə gedəcək. Azərbaycan dünya miqyasında daha da böyük yerə malik olacaq. Ölkənin keçən ilin oktyabr ayında dünyanın ən mötəbər qurumu olan BMT Təhlükəsizlik Şurasına seçildiyini vurğulayan prezident qeyd edib ki, bu eyni zamanda, dövlətdə gedən proseslərin məntiqi nəticəsidir.
O, son illər ərzində uğurlu siyasi və iqtisadi islahatların aparıldığını, ölkənin dayanıqlı inkişafa nail olduğunu qeyd söyləyib.
Prezident qeyd edib ki, keçən il 900 minə yaxın pensiyaçının orta pensiyası əhəmiyyətli dərəcədə, təqribən 40 faizə yaxın artırılıb. Bu gün Azərbaycanda orta pensiyanın səviyyəsi orta maaş səviyyəsinin 40 faizini təşkil edir. Bu, inkişaf etmiş ölkələr üçün xas olan nəticədir.
Bu yaxınlarda sovet dövrü əmanətlərinin qaytarılması ilə əlaqədar imzalanan müvafiq sərəncamın növbəti sosial və siyasi addım olduğunu bildirən prezident, bununla ölkənin nə qədər güclü sosial siyasət yürütdüyünü əyani şəkildə nümayış etdirdiyini deyib.
Prezident xatırladıb ki, son 8 il ərzində ölkə iqtisadiyyatı 3 dəfə, büdcə təxminən 15 dəfə artıb.
İlham Əliyev iqtisadi və sosial sahədə digər uğurlardan da danışıb.
Azərbaycan paytaxtının inkişaf perspektivləri barədə prezident deyib ki, Bakının tarixi gözəlliyi bu gün müasir infrastruktur layihələrinin tamamlanması ilə zənginləşdirilir. “Bakının kənd və qəsəbələrinin sosial-iqtisadi inkişaf Proqramı keçən ildən icra edilir və əminəm ki, gələn il uğurla başa çatacaq. Bütün qəsəbələrdə sosial struktur layihələri icra ediləcək”.
Dövlət başçısının sözlərinə görə, paytaxtın inkişafı ilə bağlı gələcək planlar var. “İçərişəhər” Dövlət Qoruğu çox böyük həssaslıqla, ehtiyatla, tarixilik gözlənilməklə yenidən bərpa edilir. Bütün dini abidələr, məscidlər, ictimai yerlər, küçələr abadlaşdırılır. Müasir Bakını təcəssüm etdirən bulvar genişləndirilir, yeni bulvar tikilir. Nəticə etibarilə bir-iki aydan sonra bulvarın ərazisi 13-15 kilometr təşkil edəcək.
Dövlət başçısı bildirib ki, Bayraq Meydanında aparılan geniş abadlıq işləri yekunlaşır. Şəhərin rəmzlərindən biri olan funikulyor yenidən qurulur, Xalça Muzeyi tikilir, “Bakı Venesiyası” rekonstruksiya edilir və kanallar genişləndirilir.
İlham Əliyev deyib: “Bütün bunları biz insanların rahat yaşaması üçün edirik. Bakıda işləmək və yaşamaq üçün bütün imkanlar var. Mən istəyirəm ki, Bakı dünya miqyasında ən gözəl şəhərlərdən birinə çevrilsin. Əminəm ki, gün gələcək və biz deyəcəyik ki, Bakı dünyanın ən gözəl şəhəridir. Belə də olmalıdır. Azərbaycan vətəndaşları ən gözəl şəraitdə yaşamalıdırlar. Həm böyük şəhərlərdə, həm kəndlərdə. Hər bir kənd üçün indi konkret proqramlar var və onlar icra edilir”.