Daxili siyasət

Ana səhifə

Daxili siyasət

“Yol hərəkəti haqqında” qanuna əlavə və dəyişikliklər edilib

06 aprel 2012 14:08 (UTC +04:00)

Bakı. Pərvin Abbasov – APA. Milli Məclisin iclasında “Yol hərəkəti haqqında” qanuna ciddi əlavə və dəyişikliklər edilib. APA-nın xəbərinə görə, dəyişikliklər barədə Hüquq siyasəti və dövlət quruculuğu komitəsinin sədri Əli Hüseynli məlumat verib.

Dəyişikliyə əsasən indikindən fərqli olaraq avtomobil yollarında radarın mövcudluğunu göstərən yol nişanının quraşdırılması məcburidir. Yeni əlavələrlə hərəkət sürətinin ölçülməsi üçün nəzərdə tutulan mobil və ya stasionar xüsusi texniki vasitələrdən (radarlardan) qabaqda yolda radarın mövcudluğu barədə məlumat verən servis nişanı və ya həmin yolda icazə verilən sürət həddini göstərən 3.24 "Maksimum sürətin məhdudlaşdırılması" nişanı quraşdırılmalıdır. Belə servis nişanı və ya 3.24 nişanı yaşayış məntəqələrindən kənarda müvafiq radardan 150-1000 metr qabaqda, yaşayış məntəqələrində isə 50-200 metr qabaqda quraşdırılır.

Yeni dəyişikliyə əsasən yol polisləri avtobus sürücülərini küçənin ortasında saxlaya bilməyəcək. Belə ki, şəhərdaxili (rayondaxili) sərnişin daşımaları ilə məşğul olan sürücü qaydaları pozduqda, yol polisi əməkdaşı ona qayda pozuntusunu elan etdikdən və dövlət qeydiyyat nişanını qeydə aldıqdan sonra sürücü barəsində inzibati xəta haqqında protokolu sonuncu dayanacaqda da tərtib edə bilər. Bu dəyişiklik müntəzəm şəhərdaxili (rayondaxili) sərnişin daşımalarında ləngimələrin qarşısını almaq məqsədilə edilib.
Digər dəyişikliyə görə, şəxs qayda pozuntusu və ya tətbiq edilən tənbeh növü ilə razılaşmadıqda, inzibati protokol icraatın həyata keçirilməsi üçün 1 iş günü ərzində aidiyyəti icra hakimiyyəti orqanına göndərilir. Bu halda həmin şəxsə dərhal protokolun surəti və baxılmanın yeri və vaxtı barədə bildiriş verilir.

milli_məclis