Daxili siyasət

Ana səhifə

Daxili siyasət

Prezident İlham Əliyev: “Əsas məqsədlərimizdən biri Azərbaycanda rəqabətə dayanıqlı, neft və neft-kimya məhsulları istehsal edəcək yeni Neft-Qaz Emalı və Neft-Kimya Kompleksinin inşa edilib istismara verilməsidir”

10 aprel 2012 16:15 (UTC +04:00)

APA-nın məlumatına görə, məktubda bildirilir:

“Hörmətli Forum iştirakçıları!
Sizi ölkəmizdə yeni Neft-Qaz Emalı və Neft-Kimya Kompleksinin inşasına həsr olunmuş Forumun öz işinə başlaması münasibətilə salamlayır, hər birinizə işlərinizdə uğurlar arzu edirəm.
On səkkiz il bundan əvvəl xalqımızın ümummilli lideri Heydər Əliyevin təşəbbüsü ilə Azərbaycanın yeni neft strategiyasının bünövrəsi qoyulmuş və respublikamızın uzunmüddətli inkişaf perspektivləri müəyyənləşdirilib.
Ötən dövr ərzində ölkəmiz dünyada enerji daşıyıcılarının etibarlı təchizatçısı kimi tanınıb. Neft sahəsində nüfuzlu şirkətlərlə bağlanan sazişlər, tərəfdaşlıq müqavilələri və neft-qaz layihələrinə yatırılan sərmayələr öz bəhrəsini verib, qeyri-neft sektorunun inkişafına əlverişli zəmin hazırlayıb. Neft-qaz əməliyyatlarından əldə edilən gəlirlərin saxlanılması və səmərəli idarə olunması üçün ölkəmizdə Dövlət Neft Fondu yaradılıb. Uzun illərdən bəri tam şəffaf şəkildə fəaliyyət göstərən Fondun vəsaitləri xalqımızın rifah halının daha da yüksəldilməsi naminə ən zəruri layihələrin gerçəkləşdirilməsinə yönəldilir.
Neft strategiyasının hasilatı və nəqletmə sahələrində qazanılan nailiyyətlərin məntiqi davamı olaraq, bu gün əsas məqsədlərimizdən biri Azərbaycanda rəqabətə dayanıqlı, müasir standartlara cavab verən neft və neft-kimya məhsulları istehsal edəcək yeni Neft-Qaz Emalı və Neft-Kimya Kompleksinin inşa edilib istismara verilməsidir.
Əminəm ki, Forum çərçivəsində aparılan dolğun müzakirələr, geniş təhlillər və təcrübə mübadiləsi iqtisadi inkişaf istiqamətində qarşılıqlı faydalı əməkdaşlığın dərinləşdirilməsində əhəmiyyətli rol oynayacaq.