Daxili siyasət

Ana səhifə

Daxili siyasət

Azərbaycan prezidenti “Ağstafa Aqroservis” MMC-nin açılışında iştirak edib

12 aprel 2012 14:50 (UTC +04:00)

Bakı - APA-Economics. Azərbaycan prezidenti İlham Əliyev Ağstafa rayonuna səfəri çərçivəsində “Ağstafa Aqroservis” MMC-nin açılışında iştirak edib.

Prezidentin mətbuat xidmətindən “APA-Economics”ə verilən məlumata görə, dövlət başçısına məlumat verilib ki, “Ağstafa Aqroservis” MMC-nin istifadəyə verilməsi rayonda aqrotexniki xidmətlərin müasir standartlara uyğun qurulmasına, məhsuldarlığın artırılması və torpaq ehtiyatlarından daha səmərəli istifadəyə imkan yaradacaq.

Eyni zamanda müəssisə kompleks aqrotexniki xidmətlər, o cümlədən əkilməsi məqsədəuyğun olan bitki növü və sortlarının, istifadəsi zəruri gübrə və digər preparatların müəyyənləşdirilməsi, düzgün əkin metodunun seçilməsi, şum, səpin və suvarma işlərinin aparılması, məhsulun yığımı və aqronom xidmətləri göstərməklə fermerlər və torpaq sahibləri üçün “vahid pəncərə” rolunu oynayacaq. Müəssisə tərəfindən əkinçilik təsərrüfatlarına keyfiyyətli və yüksək məhsuldarlığı təmin edən toxum, gübrə və kimyəvi preparatlar təklif ediləcək.

Ümumi sahəsi bir hektardan çox olan “Ağstafa Aqroservis” MMC-nin tikintisinə 2010-cu ilin iyununda başlanıb. Müəssisəyə Almaniyanın aparıcı şirkətlərinin istehsalı olan və müasir standartlara cavab verən texnika və avadanlıq alınıb. Burada ümumilikdə 75 traktor, qoşqu və digər texnika vardır. Müəssisə 14 min hektar sahəyə xidmət göstərmək gücünə malikdir.

Qeyd olunub ki, bu cür kənd təsərrüfatı texnikaları Cənubi Qafqazda yalnız “Ağstafa Aqroservis” MMC-də var. Müasir tələblər səviyyəsində hazırlanan bu texnikaların tətbiqi ilə daha az yanacaq və vaxt sərf etməklə yüksək iqtisadi səmərə əldə etmək mümkündür. Buradakı texnikanın əksəriyyəti, eyni zamanda 4-5 əməliyyat yerinə yetirə bilir. Müəssisənin ixtiyarında üç mobil servis maşını da var. Almaniyada istehsal olunan bu avtomobillər istənilən yerdə texnikaya xidmət göstərmək üçün kompyuter və digər zəruri avadanlıqla təchiz edilib. 30 nəfərin işlə təmin olunduğu müəssisə yalnız Ağstafa rayonunda deyil, Qazax və Tovuz ərazisində də aqroservis xidmətləri göstərməyə qadirdir.

Dövlət başçısına gələcəkdə “Ağstafa Aqroservis” MMC-nin tərkibində yaradılacaq “Taxıl anbarı, emalı və un istehsalı” bölməsi barədə də məlumat verilib. Burada aqrar laboratoriyanın yaradılması, ümumi saxlama gücü 30 min ton olan üç taxıl və 6 min tonluq üç toxum anbarının tikintisi nəzərdə tutulur. Bundan başqa, ümumi sahəsi 6 min hektar olan taxılçılıq təsərrüfatının yaradılması qarşıya məqsəd qoyulub. Avadanlığı Almaniya istehsalı olan dəyirmanın və saatda 10 ton istehsal gücünə malik çörək-qənnadı zavodunun tikilməsi planlaşdırılır. Müəssisədə 28 nəfər işlə təmin ediləcək. Layihənin 25%-ni Azərbaycan İnvestisiya Şirkəti, 75%-ni isə Almaniyanın “RAO Qlobal Qrup” şirkəti maliyyələşdirir.

Prezident İlham Əliyev Ağstafa rayonunun Böyük Kəsik qəsəbəsində inşa ediləcək “Ağstafa Süd” ASC-nin layihəsi ilə də tanış olub. Bildirilib ki, layihənin məqsədi Ağstafa rayonunda özündə yem və heyvandarlıq təsərrüfatları, süd emalı zavodunu birləşdirəcək südçülük kompleksinin yaradılmasıdır. Kompleks yem, heyvandarlıq təsərrüfatları və emal gücü saatda 5 ton olan süd zavodunu özündə birləşdirir.

Diqqətə çatdırıldı ki, ümumi sahəsi 2,7 min hektar olan yem təsərrüfatında yonca, arpa, buğda, qarğıdalı əkiləcəkdir. Bununla da kompleksdə heyvandarıq təsərrüfatı üçün il ərzində tələb olunan yemin 95 faizi bu təsərrüfatda istehsal ediləcəkdir. Kompleksin heyvandarlıq təsərrüfatında 6630 baş mal-qara bəslənilir ki, onların arasında Almaniyadan gətirilən cins inəklər də vardır.
Dövlətimizin başçısı Almaniyada istehsal edilən “Kompakt-Soliter 9” əkin aqreqatının iş prinsipi ilə tanış olub.