Daxili siyasət

Ana səhifə

Daxili siyasət

Ramil Səfərovun macar dilindən tərcümə etdiyi “Pal küçəsinin oğlanları” kitabının növbəti təqdimatı keçirilib- FOTO

Ramil Səfərovun macar dilindən tərcümə etdiyi “Pal küçəsinin oğlanları” kitabının növbəti təqdimatı keçirilib- <font color=red>FOTO</font>

14 aprel 2012 14:11 (UTC +04:00)

Bakı. Pərvin Abbasov – APA. Budapeşt şəhər məhkəməsinin hökmü ilə ömürlük azadlıqdan məhrum edilən Azərbaycan Silahlı Qüvvələrinin zabiti Ramil Səfərovun macar dilindən tərcümə etdiyi Ferens Molnarın “Pal küçəsinin oğlanları” kitabının növbəti dəfə təqdimat mərasimi keçirilib. APA-nın məlumatına görə, Gənclərə Yardım Fondunda baş tutan tədbirin təşkilatçıları “AzeBookNet” şəbəkəsi və “İdea Youth Club” olub. Təqdimatda AzeBookNet” şəbəkəsinin həmtəsisçisi Aynur Zərrintac, “İdea Youth Club”un təmsilçisi Şəfiqə Fərzəliyeva, Ramil Səfərovun atası Sahib Səfərov, ramilsafarov.com saytının admini Şəbnəm Gülməmmədova və başqaları çıxış edib.

Tədbir zamanı Ramil Səfərovla canlı telefon bağlantısı yaradılıb. O, tədbir iştirakçılarını salamlayıb və təşkilatçılara təşəkkür edib: “Əgər biz inkişafdan, tərəqqidən danışırıqsa, o zaman öncə kitaba olan diqqəti artırmalıyıq. Bilirik ki, bu sarıdan vəziyyət ürəkaçan deyil. Gənclərdə kitaba marağı artırmaq üçün əlimizdən gələni əsirgəməməliyik. Çox şadam ki, bu gün azərbaycanlı oxucular macar yazıçısının bu maraqlı əsərini öz doğma dilində oxuyaraq faydalanacaqlar. Vaxtım məhdud olduğu üçün danışa bilmirəm. Sizə işlərinizdə uğurlar, cansağlığı arzulayıram. Görüşmək üzrə deyirəm”.

Qeyd edək ki, R. Səfərov kitabı Azərbaycanın milli qəhrəmanı Mübariz İbrahimovun, "İgidliyə görə" medalı ilə təltif edilən Əhməd Abdullayevin, Fərid Əhmədovun, eləcə də Qarabağ savaşında həlak olan bütün şəhidlərin əziz xatirəsinə ithaf edib. Əsərin əhəmiyyətini kitabın girişində vurğulayan Ramil Səfərov qeyd edib ki, gənc məktəblilərin vətənpərvər ruhda tərbiyə olunması baxımından bu tərcümə əvəzsizdir: “Bir çox müştərək dəyərlərə sahib çıxan macar və Azərbaycan xalqlarının bir-birini daha yaxından tanıması istiqamətində atılan addımlara bu tərcümə kiçik bir töhfə olacaq”.

Qeyd edək ki, görkəmli macar yazıçısı F. Molnar Avropada sevilə-sevilə oxunan bir sıra məşhur əsərlərin müəllifidir. Müəllifə ən çox populyarlıq qazandıran isə onun məhz bu kitabı olub. "Pal küçəsinin oğlanları" müxtəlif nəsillərdən olan macar oxucularının masaüstü kitabıdır. Qəhrəmanlıq və vətənpərvərliyi təbliğ edən kitab bu günə qədər 20 dilə tərcümə edilib, müxtəlif ölkələrdə dəfələrlə nəşr olunub. Əsərin ssenarisi əsasında dörd film çəkilib. Sonuncu dəfə Macarıstanla ABŞ-ın birlikdə çəkdiyi film isə "Oskar" mükafatına layiq görülüb.