Daxili siyasət

Ana səhifə

Daxili siyasət

"Dövlət qulluğu haqqında" qanuna dəyişiklik edilib

20 aprel 2012 13:43 (UTC +04:00)

Bakı. Pərvin Abbasov – APA. Milli Məclis "Dövlət qulluğu haqqında" qanuna dəyişiklik edilib. APA-nın məlumatına görə, dəyişikliyə əsasən dövlət orqanlarının ali və 5 kateqoriya üzrə təsnifatı aparılacaq. (İndiyədək dövlət orqanlarının təsnifatı 7 kateqoriya üzrə aparılırdı).

Qanunvericilik, icra və məhkəmə hakimiyyəti ən yüksək dövlət orqanları ali təsnifatına, Prezident Administrasiyası, Milli Məclis və Konstitusiya Məhkəməsi ali kateqoriyalı dövlət orqanları təsnifatına, Ali Məhkəmə, Naxçıvan MR Ali Məclisi, Azərbaycan Hesablama Palatası, Məhkəmə-Hüquq Şurasının aparatı, İnsan Hüquqları üzrə Müvəkkilin (Ombudsman) aparatı isə 1-ci kateqoriyaya daxil edilib.

Digər bir dəyişiklik mərkəzi icra hakimiyyəti orqanlarının 5-ci kateqoriyadan 2-ci kateqoriyaya keçirilməsi ilə bağlıdır. Naxçıvan MR Ali Məhkəməsi, Naxçıvan MR-in müvafiq icra hakimiyyəti orqanları, Azərbaycan Respublikasının apelyasiya məhkəmələri, Azərbaycan Respublikası Mərkəzi Seçki Komissiyasının aparatı, Azərbaycan Respublikasının Korrupsiyaya qarşı mübarizə üzrə Komissiyasının katibliyi, müvafiq icra hakimiyyəti orqanları, Milli Televiziya və Radio Şurasının aparatı 2-ci kateqoriya dövlət orqanlarına aiddir.

Müvafiq icra hakimiyyəti orqanları, onların yerli bölmələri, yanında, tabeliyində olan orqanlar, rayon (şəhər) məhkəmələri 4-cü kateqoriya dövlət orqanlarına, müvafiq icra hakimiyyəti orqanlarının yanında yaradılan dövlət agentliklərinin və dövlət xidmətlərinin, müvafiq icra hakimiyyəti orqanlarının yanında, tabeliyində olan orqanların yerli bölmələri, müvafiq icra hakimiyyəti orqanlarının inzibati ərazi dairələri üzrə nümayəndəlikləri 5-ci kateqoriya dövlət orqanlarına daxil edilib.

İnzibati vəzifələrin ali və 7 təsnifatı aparılacaq.

İnzibati vəzifələrin ali təsnifatına Prezident Administrasiyasında administrasiya rəhbərinin vəzifəsi, Milli Məclisin aparat rəhbərinin vəzifəsi, Konstitusiya Məhkəməsinin aparat rəhbərinin vəzifəsi, Azərbaycan dövlətinin başçısının icra səlahiyyətlərini həyata keçirən orqanının aparat rəhbərinin vəzifəsi, Azərbaycan Respublikası dövlət müşavirlərinin vəzifəsi daxil edilib.

Yerli rayon, şəhər məhkəmələrinin mütəxəssisləri 9-cu təsnifatdan 7-ci təsnifata, ağır cinayətlər məhkəmələri, inzibati-iqtisadi və hərbi məhkəmələrin mütəxəssisləri isə 6-cı təsnifatdan 3-cü təsnifata daxil edilib.

milli_məclis