Daxili siyasət

Ana səhifə

Daxili siyasət

BAXCP Nazirlər Kabinetini “Təhsil haqqında” qanununun tələblərini pozmaqda günahlandırır

23 aprel 2012 10:32 (UTC +04:00)

Bakı. Pərvin Abbasov – APA. Bu gün Bütöv Azərbaycan Xalq Cəbhəsi Partiyası (BAXCP) İdarə Heyətinin növbəti iclası keçirilib. Partiyanın mətbuat xidmətindən APA-ya verilən məlumata görə, iclasda qərarların icrası, ictimai-siyasi vəziyyət və cari məsələlər müzakirə olunub. İclasda orta məktəblərdə buraxılış imtahanlarının keçirilməsinin Təhsil Nazirliyindən alınaraq Tələbə Qəbulu üzrə Dövlət Komissiyasına (TQDK) həvalə olunması məsələsi müzakirə edilib. Toplantıda BAXCP-nin bu qərara münasibətini açıqlayıb.

Orta məktəb məzunları üçün vahid buraxılış və qəbul imtahanlarının keçirilməsini daha məntiqli və məqsədəuyğun sayan BAXCP hökuməti bu istiqamətdə təxirəsalınmaz qərarlar qəbul etməyə çağırıb: “TQDK və Təhsil Nazirliyi arasında yaranmış qarşıdurma heç bir halda vətəndaşların, konkret halda orta məktəb məzunlarının və abituriyentlərin mənafeyinə zərbə vurmamalı, təhsilin keyfiyyətinin yüksəldilməsi, eləcə də imtahanların keçirilməsi zamanı obyektivliyin təmin olunması istiqamətində atılan addımlar real və məntiqli mexanizmlərə söykənməlidir”.

BAXCP İdarə Heyəti buraxılış və qəbul imtahanlarının TQDK tərəfindən keçirilməsi ilə bağlı qərarın növbəti dərs ilindən tətbiq olunmasını daha məqsədəuyğun saydığı da bəyan edib: “Kimsəyə sirr deyil ki, orta məktəbin son siniflərində təhsil alan şagirdlər əsasən konkret ixtisaslar üzrə repetitorların yanına getməklə ali məktəblərə qəbul imtahanlarına hazırlaşırlar. Buraxılış imtahanlarına bir ay qalmış bu imtahanların keçirilməsinin TQDK-ya həvalə olunması və bu qurumun rəhbərliyinin Təhsil Nazirliyinə olan münasibəti bu il orta məktəbləri bitirən, hətta ali məktəblərə qəbul imtahanlarında ən yüksək bal toplaya biləcək şagirdlərin böyük əksəriyyətinin attestatsız qalmasına səbəb ola bilər. Bu isə minlərlə bilikli və istedadlı şagirdin mənəvi zərbə alması, onların dövlətə olan inamının azalması deməkdir”.

BAXCP İdarə Heyətinin toplantısında tələbə köçürülmələrinin qadağan edilməsinə də münasibət bildirilib: “BAXCP hesab edir ki, tələbə köçürmələrinin “Təhsil haqqında” qanunun 5.1 və 32.3.7–ci maddələrinin tələblərinə zidd olaraq dayandırılması vətəndaşların hüquqlarının pozulmasına yönəlmiş akt kimi qiymətləndirilməlidir”.
Xatırladaq ki, Nazirlər Kabineti tələbə köçürmələrinin dayandırılması ilə bağlı müvafiq qərar qəbul edib.

BAXCP