Daxili siyasət

Ana səhifə

Daxili siyasət

İctimai Palatanın sessiyası mayın 13-də və 19-da mitinq keçirilməsini məqbul hesab edib

05 may 2012 11:28 (UTC +04:00)

APA-nın məlumatına görə, sessiyada çıxış edən AXCP sədri Əli Kərimli İP-in ötən ay üçün fəaliyyətini müsbət dəyərləndirib, bu ay da kütləvi aksiyalara üstünlük verilməsinin əhəmiyyətini vurğulayıb. Ə. Kərimli Azərbaycanda fəaliyyət göstərən diplomatik korpusla İP-in əlaqələrinin genişləndirilməsi istiqamətində zəruri addımlar atılmalı olduğunu qeyd edib. O, Ziyalılar Forumu ilə əməkdaşlığın da vacib olduğunu vurğulayıb.

Sessiyada çıxış edən İP üzvü Ərəstun Oruclu, Mustafa Hacıbəyli, Pənah Hüseyn, Nurəddin Məmmədli, İlqar Hüseyn, Soltanhəmid Məcidov, Fəzlin Mehdiyev iqtidara qarşı mübarizədə kütləvi aksiyalardan vasitə kimi istifadə olunmasının vacibliyini qeyd ediblər. Təklif olunub ki, növbəti etiraz aksiyaları “Məni həbs et” şüarı altında keçirilsin.

Müsavat başqanı İsa Qəmbər isə çıxışında İP-in taktikasına dəyişiklik edilməsinin mövcud reallığa uyğun olduğunu deyib. O bildirib ki, may ayında artan xətt üzrə kütləvi aksiyalar keçirilməlidir: “Lazın gələrsə, “Eurovision” günlərində - mayın 20, 21, 22, 23-də də aksiyalar keçirməliyik. Əgər bizim silahdaşlarımız və dostlarımız azad edilməsə, mübarizə aparıb, həbsə girməyə də hazırıq”.

İ. Qəmbər mitinqlərin keçirilməsi və “Eurovision”la əlaqədar mətbuat mərkəzinin yaradılması məsələsinin səs qoyulması təklifi ilə də çıxış edib.

Çıxışlardan sonra sessiyanın bəyanatı qəbul olunub, mətbuat mərkəzinin yaradılması, mayın 13-də və 19-da mitinqin keçirilməsi məsələləri səsə qoyulub.

Sessiya mətbuat mərkəzinin yaradılmasını və qeyd olunan tarixlərdə mitinqlərin keçirilməsini məqbul hesab edib, aksiyaların keçirilməsi ilə bağlı detalların müəyyənləşməsini Koordinasiya Şurasına həvalə edilib.

İP