Daxili siyasət

Ana səhifə

Daxili siyasət

Müsavat VIII qurultayını keçirmək üçün Bakı şəhər İcra Hakimiyyətinə müvafiq yer ayırması xahişi ilə müraciət edib

08 may 2012 14:02 (UTC +04:00)

Bakı. Ramil Məmmədli - APA. Müsavat Partiyası VIII qurultayını keçirmək üçün Bakı şəhər İcra Hakimiyyətinə müvafiq yer ayırması xahişi ilə müraciət edib.

Partiyanın mətbuat xidmətindən APA-ya verilən məlumata görə, müraciət Bakı şəhər İcra Hakimiyyətinin başçısı Hacıbala Abutalıbova ünvanlanıb. Müraciətdə artıq 4-cü dəfə paytaxt meriyasına qurultayla bağlı məktub ünvanlandığı qeyd olunmaqla yanaşı, partiyanın ali qurumunun keçirilməsində yaranan texniki problem, təşkilatın təklifləri, onları qane etməyən məqamlar, istək və təklifləri əksini tapıb.

Müraciətdə qeyd olunub ki, paytaxt meriyasının təklif etdiyi zallarda Müsavat Partiyasının VIII qurultayının keçirilməsi mümkün deyil: “Bakı şəhər İdman Sarayında yarışların keçirilməsi qrafikinə uyğun olaraq “Eurovision” Beynəlxalq Mahnı Müsabiqəsinədək qarşılıqlı razılaşma əsasında qurultayın baş tutması üçün münasib gün müəyyənləşdirmək olar”.

Müraciətdə H. Abutalıbovun diqqətinə çatdırılıb ki, bu günə qədər belə təklifin olmaması Azərbaycan hakimiyyətinin 100 illik tarixi olan, şərqdə ilk demokratik respublikanın yaradıcılarından olan Müsavat Partiyasına ögey münasibətinin təzahürüdür: “Sizdən Konstitusiyanın və “Siyasi partiyalar haqqında” qanunun tələblərini yerinə yetirərək, Müsavat Partiyasına növbəti VIII qurultayının keçirilməsi üçün 800-1000 nəfərin yerləşə biləcəyi müvafiq iclas zalının ayrılmasına yardımçı olmanızı xahiş edirik”.

Partiya müraciətində qeyd edib ki, Müsavat Partiyasına VIII qurultayını keçirməsi üçün yer ayrılması ilə bağlı 18 may 2012-ci il tarixinədək müsbət cavab verilmədiyi təqdirdə, partiya qurultay keçirməsi üçün qonşu Türkiyə və Gürcüstan dövlətinə müraciət etmək haqqından istifadə edəcək.