Daxili siyasət

Ana səhifə

Daxili siyasət

Bakı Şəhər İcra Hakimiyyəti İctimai Palataya 13 may mitinqini Bibiheybət qəsəbəsində keçirməyi təklif edib

11 may 2012 13:03 (UTC +04:00)

Bakı. Ramil Məmmədli – APA. Bakı Şəhər İcra Hakimiyyəti (BŞİH) İctimai Palatanın (İP) mayın 13-nə təyin etdiyi yürüş-mitinqlə bağlı müraciətini bu gün cavablandırıb.

Müsavat Partiyası başqanının müavini Tofiq Yaqublu APA-ya bildirib ki, cavab məktubunda aksiyanın saat 16.00-dan 18.00-dək Bibiheybət qəsəbəsi, 20-ci sahə, Sürücülük Məktəbinin həyətindəki meydançada keçirilməsi təklif edilib.

T. Yaqublu deyib ki, paytaxt rəhbərliyinin məktubuna İP-in münasibəti birmənalıdır: “Biz əvvəlcədən də 20-ci sahədə aksiya keçirmək niyyətinə olmadığımızı bildirmişik. Mitinqə normalı yer verilməməsi ilə bağlı etiraz aksiyalarımızı davam etdirəcəyik. Mayın 14-də bu tələblə növbəti etiraz aksiyamız keçiriləcək. Lakin aksiyanın yeri və saatı hələ açıqlanmır”.

T. Yaqublu qeyd edib ki, mayın 13-də İP-in razılaşdırılmamış mitinq keçirib-keçirməməsi məsələsi də açıq qalıb: “İctimai Palatanın Koordinasiya Şurasının iclası cavab məktubundan əvvəl keçirildiyindən bu məsələyə münasibət bildirilməsi mümkün olmadı. Ancaq qurum rəhbərliyi mitinq məsələsinə dair müzakirələr aparacaq”.

Qeyd edək ki, İctimai Palata mayın 13-də saat 16.00-dan 18.00-a qədər Binəqədi rayonu 7-ci mikrorayonda İnqilab kinoteatrının qarşısından Süleyman Sani Axundov küçəsini keçməklə “Dərnəgül” metro stansiyasının qarşısında yürüş mitinq-keçirmək və mayın 14-də Bakı Şəhər İcra Hakimiyyətinin (BŞİH) binası önündə piket təşkil etməklə bağlı qərar qəbul edib.