Daxili siyasət

Ana səhifə

Daxili siyasət

Müsavat Partiyasının 2 üzvü aclığı dayandırıb

17 may 2012 11:12 (UTC +04:00)

Bakı. Ramil Məmmədli - APA. Müsavat Partiyasının qərargahında keçirilən aclıq aksiyasında iştirak edən iki nəfər aclığı dayandırıb. Müsavat Partiyası başqanının müavini Tofiq Yaqublu APA-ya açıqlamasında deyib ki, partiya üzvləri Yeganə Hacıyeva və Günel Rəhimli səhhətlərində yaranan problem üzündən aclıq aksiyasını dayandırmaq məcburiyyətində qalıblar. İP üzvləri Lətafət Məlikova və Yeganə Əmiraslanova isə aksiyaya yeni qoşulub.

T. Yaqublu aclıq aksiyasına qoşulmaq istəyənlərin çox olduğunu, lakin yer azlığı səbəbindən buna imkan yaradılmasının qeyri-mümkünlüyünü də bildirib: “Aksiyanın keçirilməsi üçün iki otağımız var. Bunun biri qadınlar üçün ayrılıb. Əlavə boş otaqlarımızın olmaması aksiyaya qoşulmaq istəyənlərin sayının artmasına imkan vermir. Çünki aksiya zamanı tibbi və gigiyenik məsələlərə diqqət yetirilməlidir”. O, hazırda 8 nəfərin aclıq aksiyası keçirdiyini deyib.

Qeyd edək ki, hazırda Müsavatçı Qadınlar Birliyinin sədri Vəfa Cümşüdlü, həbsdə olan Rüfət Hacıbəylinin atası İbrahim Hacıbəyli, Elşən Həsənov, Müsavat Partiyası Ağdam rayon təşkilatının sədri Haqverdi Haqverdiyev, həbsdə olan Tural Abbaslının anası Başxanım Abbasova, Müsavat başqanının müşaviri Dünyaxanım Cərullayeva, Lətafət Məlikova və Yeganə Əmiraslanova aclıq aksiyasına başlayıb.

Xatırladaq ki, hazırda həbsdə olan Arif Hacılı, Babək Həsənov, Bəxtiyar Hacıyev, Əhəd Məmmədli, Məhəmməd Məcidli, Rüfət Hacıbəyli, Sahib Kərimov, Şahin Həsənli, Tural Abbaslı, Ülvi Quliyev, Vidadi İsgəndərli və Zülfüqar Eyvazlı mayın 15-dən aclıq aksiyası keçirir. Müsavat Partiyasının qərargahında keçirilən aksiya həbsdə olan şəxslərin aclıq aksiyasına dəstək xarakteri daşıyır.

müsavat_aclıq