Daxili siyasət

Ana səhifə

Daxili siyasət

Sülhəddin Əkbərin Açıq Cəmiyyət Partiyasının sədri vəzifəsinə gətirilməsi razılaşdırılıb

25 may 2012 12:38 (UTC +04:00)

ACP-dəki mənbədən APA-ya verilən məlumata görə, R. Quliyevlə S. Əkbər arasında keçirilən görüşdə ölkədəki ictimai-siyasi proseslər, ACP-nin fəaliyyətinin genişləndirilməsi, o cümlədən partiyada kadr dəyişiklikləri müzakirə olunub. Danışıqlarda S. Əkbər ACP sədri postunu tutmasına dair R. Quliyevin təklifini müsbət dəyərləndirib. Görüşdə o da qərara alınıb ki, yaxın bir həftə ərzində ACP Ali Məclisinin iclası keçirilsin və S. Əkbərin sədr postuna təyinatı rəsmiləşdirilsin.

ACP-dəki mənbə onu da bildirib ki, bu məsələnin gizli saxlanılmasına səbəb partiyadaxili parçalanmanın başa verməsinin qarşısını almaqdır. Hazırda bu məlumatı partiyada məhdud sayda şəxslər bilir.

Məsələyə ACP sədri Vaqif Mahmudovun münasibətini öyrənmək mümkün olmayıb. ACP liderinin müşaviri Ağasif Şakiroğlu isə hələlik bu mövzuda partiya liderindən rəsmi məlumat almadıqlarını söyləyib: “Görüşlə bağlı Rəsul Quliyev tərəfindən rəsmi açıqlama veriləcək. İstənilən halda bizim üçün partiyada əsas şəxs Rəsul Quliyevdir. Partiya sədrinin kimliyi təşkilatın siyasi xəttini dəyişməyəcək və Rəsul Quliyev nə desə, o da olacaq. Bu baş versə belə partiyada hər hansı narazılığın olacağını düşünmürəm. İnanıram ki, Vaqif Mahmudov sıravi üzv olaraq da partiyada öz fəaliyyətini davam etdirəcək. Hazırda isə partiya Vaqif Mahmudovun sədrliyi ilə fəaliyyət göstərir”.

ACP sədri Vaqif Mahmudov isə APA-ya deyib ki, partiyada kiminsə sədr vəzifəsinə təyin olunması, təşkilatın liderinin səlahiyyətindədir: “Partiya lideri Azərbaycanda olmadığından, Açıq Cəmiyyət Partiyasının buradakı məsələləri ilə sədr məşğul olur. Əslində isə partiyanın lideri qurumun birbaşa rəhbəridir”.

V. Mahmudov bildirib ki, Müsavat Partiyası Məclisinin keçmiş sədri Sülhəddin Əkbərin ACP sədrliyinə gətirilməsi məsələsinin razılaşdırılmasına dair məlumatı yoxdur: “Təşkilatın sədri isə faktiki olaraq, liderin köməkçisi və ya birinci müavinidir. Digər tərəfdən, prosedur qayda var və bu məsələ Ali Məclisdə həll oluna bilər. Burada da narahatlıq doğuran məsələ yoxdur. Partiyanın lideri Ali Məclisə təqdimat verdikdən sonra ACP sədrinin kimliyinin müəyyənləşməsində heç bir narahatlıq ola bilməz. Məclisin qəbul etdiyi istənilən şəxs partiyanın sədri ola bilər”.

V. Mahmudov partiyanın Ali Məclisin iclasının yaxın günlərdə keçiriləcəyini də istisna etməyib.

Qeyd edək ki, Müsavat Partiyası Məclisinin keçmiş sədri Sülhəddin Əkbər hazırda Avroatlantika Əməkdaşlıq Assosiasiyasının rəhbəridir.

ACP_Sülhəddin