Daxili siyasət

Ana səhifə

Daxili siyasət

Rafael Hüseynovun AŞ Nazirlər Komitəsinə təqdim etdiyi sənəddə Ermənistanın Naxçıvanı işğal etmək niyyətində olduğu xüsusi qeyd edilib

23 yanvar 2007 09:03 (UTC +04:00)

APA-nın Strasburqdakı müxbirinin verdiyi məlumata görə, sənəddə bildirilir ki, Azərbaycanın ayrılmaz hissəsi olan Dağlıq Qarabağı və onun ətrafındakı 7 rayonu işğal edərək, son 15 il müddətində nəzarəti altında saxlayan Ermənistan beynəlxalq təşkilatların bütün səylərinə baxmayaraq, təcavüzkar siyasətinə son qoymaq istəmir: “Zəbt etdiyi əraziləri xarabalığa çevirən, ekoloji tarazlığı pozan, işğal altındakı torpaqlardakı meşə və bitki örtüyünü, maddi və mədəni sərvətləri dağıdan və qəsb edən Ermənistan işğalın çərçivəsini genişləndirmək istiqamətində konkret addımlar atmaqdadır. İşğal altındakı ərazilərdən oğurladığı tarixi abidələri, müxtəlif xalq sənəti nümunələrini, o cümlədən minlərlə xalçanı özününküləşdirən Ermənistan zəbt etdiyi ərazilərin guya qədimdən onlara məxsus olduğuna qondarma əsaslar yaratmaq üçün hətta Azərbaycanın qocaman tarixi məzar daşlarına belə sahib çıxır. IX əsrə İslamın Azərbaycana gəlişinə qədər ölkə əhalisinin əsas dinlərindən biri xristianlıq olub. Ermənilər Azərbaycanın ən müxtəlif guşələrində, o cümlədən elə işğal altındakı ərazilərdə də mövcud olan çoxsaylı Azərbaycan xristian abidələrini, kilsələri, üstündə xaç işarəsi olan ayrı-ayrı tikililəri, qəbir daşlarını özününküləşdirməyə çalışır”.
R.Hüseynov sənəddə Ermənistanın Naxçıvanı da işğal etmək niyyətində olduğunu bildirib: “Blokada vəziyyətində saxladığı Naxçıvan Muxtar Respublikasını ələ keçirmək niyyətini Ermənistan hətta rəsmi səviyyədə bəyan etməkdən belə çəkinmir. Ermənistanın Naxçıvanla bağlı yeni işğal planları son dövrlərdə bir qədər də intensivləşib. 2006-cı ilin dekabrında Strasburqdakı Bələdiyyə Mərkəzində Naxçıvan mədəni abidələrini əks etdirən sərginin açılmasına nail olan Ermənistan həmin ekspozisiyada Naxçıvanı birbaşa olaraq Ermənistana məxsus ərazi kimi təqdim edib. Ermənistan xarici işlər nazirinin və Strasburq rəsmilərinin həmin mərasimə qatılması bu aksiyanın siyasi mənasındakı təhlükə və narahatlığı artırmaya bilməz. AŞPA-nın 2005-ci il 25 yanvar tarixli 1416 saylı qətnaməsində birmənalı olaraq təcavüzkar adlandırılmış Ermənistanın Azərbaycana qarşı yeni işğal planları Qazax rayonu səmtində atəşkəsin son dövrlərdə intensiv şəkildə pozulması, Naxçıvana qarşı ən müxtəlif provokasiyaların törədilməsi, Ermənistanda Naxçıvanla əlaqədar təbliğati və hərbi strukturların yaradılması ilə müşayiət edilməkdədir”.
Bütün bunları nəzərə çatdıran R.Hüseynov sənədin sonunda Nazirlər Komitəsinə sual edir: “Beynəlxalq hüququn norma və prinsiplərinə əməl etməyən, beynəlxalq qurumların, o cümlədən Avropa Şurasının qətnaməsinə məhəl qoymadan aqressiv siyasətini davam etdirən, Azərbaycana qarşı yeni ərazi iddialarını gerçəkləşdirmək üçün real və təhlükəli addımlar atan Ermənistanı dayandırmaq üçün Nazirlər Komitəsi öz səlahiyyətləri çərçivəsində hansı təcili tədbirlər görə bilər və qeyri-konstruktiv siyasətini inadla davam etdirən, Avropa Şurası nizamnaməsini və tələblərini ardıcıl şəkildə, həm də nümayişkaranə şəkildə pozan Ermənistanın bu təşkilatdan qovulması niyə ləngidilir?” /APA/