Daxili siyasət

Ana səhifə

Daxili siyasət

Rəsul Quliyev: “Akif Şahbazov düzgün addım atıb, Qurultaya Hazırlıq üzrə Təşkilat Komitəsinin qəbul etdiyi qərarların hüquqi qüvvəsi yoxdur”

08 fevral 2007 09:37 (UTC +04:00)

Bu fikirləri APA-ya eksklüziv açıqlamasında Azərbaycan Demokrat Partiyasının (ADP) hazırda ABŞ-da olan sədri Rəsul Quliyev Ali Məclisin sədri Akif Şahbazovun ötən gün imzaladığı sərəncama münasibət bildirərkən deyib. Məclisin qəbul etdiyi qərarda olan bir müddəa ilə razılaşmadığını bildirən R.Quliyev buna görə sözügedən qərara partiya sədri olaraq imza atmayacağını qeyd edib. R.Quliyev həmçinin, partiyanın növbəti qurultayının keçirilməsi üçün Qurultaya Hazırlıq üzrə Təşkilat Komitəsinin yaradılması məsələsinə də münasibət bildirib: “Təşkilat Komitəsinin tərkibi mənimlə razılaşdırılmayıb. Ona görə də Komitənin özünün və qəbul etdiyi qərarların heç bir hüquqi qüvvəsi yoxdur”.
ADP-nin Qurultaya hazırlıq üzrə Təşkilat Komitəsinin sədri Sərdar Cəlaloğlu isə APA-ya açıqlamasında bildirib ki, partiya Nizamnaməsinə görə, Ali Məclisin qərarını nə sədrin, nə də Məclis sədrinin ləğv etmək ixtiyarı var: “Bu özbaşınalıqdır. Ola bilsin ki, Rəsul Quliyevin Nizamnamə barədə təsəvvürü yoxdur. O, şəxsən mənə qərarın əleyhinə olması barədə bir söz deməyib, əksinə, qərarın icrası ilə bağlı həm Həsrət Rüstəmova, həm mənə tapşırıqlar verib. Nizamnaməyə görə, partiya sədri razılaşmadığı qərarı maksimum yenidən baxmaq üçün Ali Məclisə göndərə bilər. İkinci dəfə həmin qərar Məclis tərəfindən təsdiq olunsa, MNTK-nın razılığı ilə qüvvəyə minir. Sədrin də vəzifəsi həmin qərarı icra etməkdir. Ali Məclisin qərarına belə münasibət Məclis üzvlərinə hörmətsizlikdir”. R. Quliyevin Qurultaya hazırlıq üzrə Təşkilat Komitəsi ilə bağlı dediklərinə gəldikdə, S.Cəlaloğlu tərkibin Ali Məclisdə müəyyənləşdiyini bildirib. S.Cəlaloğlunun sözlərinə görə, ona qarşı yönəlmiş bu cür çıxışlar partiyanın qurultayında sədrliyə namizəd olacağı haqda məlumat yayıldıqdan sonra başlayıb: “Rəsul Quliyev deyir ki, ADP-də demokratik qurultay keçiriləcək, demokratik qurultayda da alternativ namizədlər olmalıdır. İlk alternativlə bağlı məlumat yayılan kimi isə başladılar ki, Məclisdə kvorum yoxdur, sonra dedilər ki, bu qərardan Rəsul Quliyevin xəbəri olmayıb, indi də deyirlər ki, Komitənin tərkibi razılaşdırılmayıb. Tərkibi partiyanın İdarə Heyətindən, İcra Aparatından və Məclisin Rəyasət Heyətindən formalaşıb. Məclisdən sonra Rəsul Quliyev dəfələrlə Həsrət Rüstəmovla əlaqə saxlayıb, qurultaya hazırlıq işləri ilə maraqlanıb. Sadəcə, mən öz namizədliyimlə bağlı fikir bildirdikdən sonra bu narahatlıq yaranıb. Bu cür şantaj xarakterli üsullara əl atırlar ki, mən partiya sədrliyinə namizədliyimi irəli sürməyim. Əgər mənim namizədliyimdən narahatdırlarsa, açıq desinlər. Təəssüf edirəm ki, Rəsul Quliyev bizimlə mətbuat vasitəsilə danışır”.
Bu cür şantaj və böhtanla demokratik seçkinin qeyri-mümkünlüyünü vurğulayan S.Cəlaloğlu Məclisin qərarından sonra R.Quliyevin onlara heç bir irad bildirmədiyini, onun namizədlik məsələsi ortaya çıxdıqdan sonra hətta müavinləri ilə əlaqəni belə kəsdiyini söyləyib: “Biz sədrin iradlarını mətbuat vasitəsi ilə öyrənirik. Bu məsələdə onu da qınamıram. Çünki ona yalan informasiya verən adamlar var. Kimlərsə rayon təşkilatları adından bəyanatlar hazırlayır, guya qurultayda kimisə dəstəkləməklə bağlı fikirlər bildirirlər”. /APA/