Daxili siyasət

Ana səhifə

Daxili siyasət

Rəsul Quliyev hələlik ADP sədrliyinə namizədliyini irəli sürməyib

05 aprel 2007 15:10 (UTC +04:00)

Rəsul Quliyevin rəhbərlik etdiyi ADP qurultaya hazırlıq işlərini yekunlaşdırmaq üzrədir. Bu barədə APA-ya partiyanın Qurultaya Hazırlıq üzrə Təşkilat Komitəsinin sədr müavini Akif Şahbazov məlumat verib. Onun sözlərinə görə, rayon təşkilatlarının əksəriyyətində konfranslar keçirilib və qurultaya nümayəndələr seçilib. Sədr müavini bundan sonra cəmi 3 rayon təşkilatında konfransların keçiriləcəyini bildirib. Qurultayda sədrliyə namizədlərə gəldikdə, A. Şahbazov hələlik yalnız bir nəfərin bu iddianı ortaya qoyduğunu qeyd edib: “İndiyə qədər yalnız Yaqub Abbasov qurultaydan öz namizədliyini irəli sürəcəyini bildirib və buna əsaslanıb deyə bilərəm ki, 1 namizədimiz var. Rəsul Quliyev isə namizədliyi ilə bağlı bizimlə hər hansı müzakirə aparmayıb və belə bir niyyət açıqlamayıb”. A. Şahbazov Bakı Şəhər İcra Hakimiyyətinin qurultayın keçirilməsi ilə bağlı edilmiş müraciətə hələlik cavab vermədiyini deyib: “Biz müraciətimizdə 3 yer göstərmişik və güman edirik ki, bu yerlərdən birində tədbir keçirməyə razılıq veriləcək”.
Bakı Şəhər İcra Hakimiyyətindən isə APA-ya bildirilib ki, müraciət idarəyə daxil olub və araşdırma aparılır. Müraciətə qanunauyğun olaraq cavab veriləcəyi qeyd olunub. /APA/