Daxili siyasət

Ana səhifə

Daxili siyasət

Rumıniya Senatının sədri: “Azərbaycan Avropa İttifaqına inteqrasiya prosesində Rumıniyanın qanunvericilik təcrübəsindən yararlana bilər”

10 aprel 2007 08:33 (UTC +04:00)

- Rumıniya və Azərbaycan parlamentləri arasında münasibətləri necə xarakterizə edərdiniz?
- 2000-ci ildən bu günə qədər Rumıniya Senatının sədri olaraq parlament diplomatiyasına xüsusi diqqət ayırmışam. Parlamentlər və millət vəkilləri arasında birbaşa təmaslar anlaşma və bir sıra müsbət ikitərəfli və çoxtərəfli münasibətlərin yaradılması üçün çox effektiv vasitədir. Bu, Rumıniya və Azərbaycan parlamentləri arasında münasibətlərə də aid olunmalıdır. Həmin münasibətlərdə Milli Məclisin sədri Oqtay Əsədovun Buxarestə səfəri əlamətdar rol oynadı. Oqtay Əsədovla söhbətlərdən yaddaşıma ölkələrimiz arasında əməkdaşlığın gücləndirilməsində parlamentlərarası münasibətlərin dəyəri və əhəmiyyəti, eləcə də sərhədlərin toxunulmazlığı və ərazi bütövlüyü prinsiplərinə dair ortaq mövqelərimiz həkk olunub. Beləliklə, parlament səviyyəsində əlaqələrimizi çox yaxşı olaraq səciyyələndirərdim və çoxsaylı sahələrdə ikitərəfli münasibətlərin genişləndirilməsi baxımından mükəmməl perspektivləri mövcuddur. Oqtay Əsədovun 2006-cı ilin dekabrında həyata keçirilmiş Rumıniya prezidenti və Senat sədri ilə ən yüksək səviyyəli görüşləri əhatə edən səfəri siyasi və iqtisadi dairələr üçün Rumıniya-Azərbaycan əlaqələrinin qarşılıqlı mənfəət zəminində genişləndirilməsi baxımından güclü siqnal rolunu oynadı.
- Azərbaycana gözlənilən səfəriniz zamanı hansı məsələlər müzakirə ediləcək?
- Etiraf edim ki, sizin gözəl ölkənizi görməyi, elə bu il Azərbaycan xalqının qonaqpərvərliyindən bəhrələnməyi, sizin siyasi liderləriniz ilə mənalı söhbətlər aparmağı çox arzu edərdim. Təəssüf ki, Rumıniyanın daxili siyasi vəziyyəti mənim Buxarestdə olmağımı tam zəruri edir. Buna görə də heyf ki, bu təqvim ilində cənab sədr Oqtay Əsədovun dəvətini həyata keçirə bilməyəcəyəm. Ancaq sizi əmin edirəm ki, Oqtay Əsədovun dəvətini mümkün qədər tez gerçəkləşdirmək üçün mümkün olan hər şeyi edəcəyəm.
- Azərbaycanla Rumıniya arasında əməkdaşlıq hansı səviyyədədir?
- Dediyim kimi, siyasi səviyyədə münasibətlər mükəmməldir. Fikrimcə, daha yaxşı və daimi qarşılıqlı tanışlığa ehtiyac var, bir-birimizin təcrübəsini və ölkələrimizdəki bu əsaslı dəyişikliklər dövründə qarşılaşdığımız çətinlikləri bölüşməyimiz lazımdır. Rumıniyanın Avropa İttifaqının üzvü olması və Azərbaycanın iqtisadi inkişafının diqqəti cəlb edən ritmi genişmiqyaslı iqtisadi əməkdaşlıq üçün olduqca əlverişli şərtlərdir. Oqtay Əsədovun Rumıniyaya səfəri zamanı söylədiyi “Azərbaycanın prioritet sahələrindən biri Rumıniyanın enerji təhlükəsizliyini təmin etməkdən ibarətdir” fikri və Azərbaycan mütəxəssislərinin bu istiqamətdə çalışmasına dair verdiyi təminat Rumıniyada çox dəyərləndirilən siyasi və iqtisadi siqnal kimi qəbul olunur. Öz növbəmizdə biz Azərbaycanı Rumıniyanın beynəlxalq səviyyədə tanınmış təcrübəyə malik olduğu neft, qaz sektoru üçün yüksək keyfiyyətli avadanlıq, sənaye armaturları, enerji və kənd təsərrüfatı sektoru üçün avadanlıq ilə təchiz edə bilərik.
- Rumıniya və Azərbaycan qanunvericilik orqanları arasında əməkdaşlığın səviyyəsi sizi qane edirmi?
- Əməkdaşlığın daha yaxşı olmasına həmişə ehtiyac var və həmişə bir-birimizdən öyrənə biləcəyimiz işlər olacaq. İkitərəfli səviyyədə yaxşı əlaqələrimiz var və birlikdə çoxtərəfli sahədə də bir o qədər yaxşı çalışırıq. Bizim parlament nümayəndə heyətlərimiz çox yaxşı əməkdaşlıq edir, buna misal olaraq Avropa Şurası Parlament Assambleyası səviyyəsində əməkdaşlığımızı göstərə bilərəm. Bu baxımdan qərara aldıq ki, Rumıniya parlamentinin təmsilçiləri Azərbaycan tərəfinə Avropa İttifaqına inteqrasiya prosesi zamanı əldə olunmuş qanunvericilik təcrübəsini təqdim etsinlər. Bu məqsədə nail olmaq üçün hər iki parlamentdə qanun layihələrinin peşəkar səviyyədə müzakirə olunduğu daimi komissiyaların deputatları arasında görüşlər yerinə düşərdi. Rumıniya parlamenti xüsusilə intensiv əmək həyata keçirib və nəticədə 12 ilə yaxın müddət ərzində Avropa İttifaqın hüquq və öhdəliklərinə uyğun minlərlə qanun qəbul edib. Biz Oqtay Əsədovla bu fikrə gəldik ki, bu sahədə əlaqələrin gücləndirilməsində Rumıniya-Azərbaycan dostluq qruplarının da mühüm payı ola bilər.
- Rumıniya yanvarın 1-dən Avropa İttifaqına üzv qəbul olunub. Buxarest bu quruma inteqrasiya məqsədilə Azərbaycana necə kömək edə bilər?
- Təcrübəmizə əsaslanaraq deyə bilərəm ki, Avropa İttifaqına inteqrasiya mürəkkəb və vaxt aparan prosesdir. Bu prosesin vaxtında başa çatması siyasi və iqtisadi faktorlardan, həm də müəyyən siyasi konyukturdan asılıdır. Mən hazırda Avropa İttifaqının üzvlərinin 27-ə çatmasından sonra meydana çıxan qurumdaxili problemləri nəzərdə tuturam. Siyasi, iqtisadi və qanunvericilik baxımından Avropa İttifaqı normalarına uyğunluq təşkil etmək üçün dözüm, səbir və səylərə ehtiyac var. Avropa İttifaqı ilə müzakirələrin uğurla başa çatması və 2006-cı ilin noyabr ayında Avropanın Yeni Qonşuluq Siyasəti proqramı çərçivəsində Fərdi Fəaliyyət Planının imzalanması Azərbaycan üçün mühüm addım hesab olunmalıdır. Rumıniya Azərbaycanın Avropa qurumları ilə yaxınlaşmaq istiqamətində səylərini dəstəkləyir. /APA/