Daxili siyasət

Ana səhifə

Daxili siyasət

USAİD-in dəstəyi ilə həyata keçirilən “Vətəndaş Cəmiyyəti” layihəsinin təqdimat mərasimi olub

07 may 2007 16:28 (UTC +04:00)

Bu gün ABŞ-ın Beynəlxalq İnkişaf Agentliyinin (USAİD) dəstəyi ilə Azərbaycanda həyata keçirilən “Vətəndaş Cəmiyyəti” layihəsinin təqdimat mərasimi olub. APA-nın məlumatına görə, tədbirdə qeyri-hökumət təşkilatları, icma əsaslı təşkilatlar, biznes dairələri və media qurumlarından ibarət 6 koalisiya Azərbaycanda sosial-iqtisadi vəziyyətin yaxşılaşdırılmasını hədəf götürən kampaniyalar vasitəsilə vətəndaşları və hökuməti bir araya gətirmək üçün öz planlarını açıqlayıblar. Mərasimdə çıxış edən ABŞ-ın Azərbaycandakı səfiri Ann Dersi bildirib ki, ABŞ Azərbaycanda və dünyada vətəndaş cəmiyyətinin inkişafına hər cür yardım göstərməyə hazırdır: “İnsanlar öz hüquqlarını bilməli, vətəndaş cəmiyyətinin qurulmasında fəal iştirak etməli, dövlət də buna kömək etməlidir”. Səfir Azərbaycan hakimiyyətinə, xüsusən də Prezident Aparatına və İqtisadi İnkişaf Nazirliyinə “Vətəndaş Cəmiyyəti” layihəsinin həyata keçirilməsində göstərdiyi yardıma görə təşəkkürünü bildirib. Tədbirdə çıxış edən Prezidentin İcra Aparatının sektor müdiri Tahir Süleymanov Azərbaycanda vətəndaş cəmiyyətinin inkişafında göstərdiyi yardıma görə ABŞ-a və USAİD-ə minnətdarlıq edib: ”Azərbaycan hökuməti bundan sonra da vətəndaş cəmiyyəti ilə bağlı layihələri dəstəkləyəcək”. Sonda layihə çərçivəsində yaradılmış 6 yerli koalisiyanın nümayəndələri hesabatla çıxış ediblər. /APA/