Daxili siyasət

Ana səhifə

Daxili siyasət

“22 May - Güney Azərbaycan Milli Azadlıq Hərəkatının ildönümü” mövzusunda dəyirmi masa keçirilib

22 may 2007 11:20 (UTC +04:00)

Güney Azərbaycan Milli Azadlıq Hərəkatına Dəstək Komitəsi (GAMAH DK) “22 May - Güney Azərbaycan Milli Azadlıq Hərəkatının ildönümü” mövzusunda dəyirmi masa keçirib. APA-nın məlumatına görə, GAMAH DK-nın təsisçisi Tofiq Seyid 2006-cı ilin may-iyun aylarında İranın azərbaycanlılar yaşayan şəhərlərində baş verən hadisələrlə 1980-90-cı illərdə Sovet Azərbaycanındakı olaylar arasında paralellik aparıb: “1988-ci ildə Bakıda başlanan ilk mitinqlərdə meydana Sovet Azərbaycanının bayraqları ilə çıxan millət rus hərbi birləşmələrinin silahlı müdaxiləsindən sonra anladı ki, Azərbaycan müstəmləkədir. 1990-cı il 20 Yanvar hadisələri isə prosesin pik nöqtəsi idi. Güney Azərbaycan türkləri də 22 mayda növbəti dəfə kimliyini ortaya qoydu və ona sahib çıxmağa çalışdı”. GAMAH DK-nın İdarə Heyətinin üzvü Sirus Azadi Azərbaycan Respublikasını İranda yaşayan azərbaycanlılara dəstək verməməkdə ittiham edib. Onun sözlərinə görə, İrandakı azərbaycanlıların hüquqlarının pozulmasına Azərbaycan dövləti münasibət bildirməlidir. Tarixçi-alim Əkrəm Rəhimli hadisələrə düzgün yanaşmağın tərəfdarı olduğunu deyib: “İranda azərbaycanlıların özünüdərk ideyası kütləviləşib və bu proses azadlığın bünövrəsini təşkil edir. Azərbaycanlılara qarşı qeyri-insani münasibət 1925-ci ildə Pəhləvilər sülaləsinin İranda hakimiyyəti zorla ələ keçirməsindən sonra başlanıb. O vaxtdan indiyə qədər İranda şovinist fars ideologiyası hegemonluq edib və millətlər arasında bərabərlik pozulub”. Dəyirmi masanın sonunda tədbir iştirakçıları adından dünya ictimaiyyətinə müraciət qəbul olunub. Müraciətdə İranda yaşayan azərbaycanlılar insani və milli haqlarını almaq üçün mübarizəyə çağırılıb. /APA/