Daxili siyasət

Ana səhifə

Daxili siyasət

“Azadlıq” bloku müxalifətin yeni alyansında təmsil olunmaqla bağlı müraciətə rədd cavabı verib

23 may 2007 15:24 (UTC +04:00)

“Azadlıq” bloku müxalifətin yeni alyansında təmsil olunmaqla bağlı müraciətə mənfi cavab verib. Blokun Sədrlər Şurasının üzvü, Vətəndaş və İnkişaf Partiyasının (VİP) sədri Əli Əliyevin APA-ya verdiyi məlumata görə, Sədrlər Şurasının bu gün keçirilən iclasında müraciət müzakirə edilib və yeni alyansa qoşulmamaqla bağlı qərar qəbul olunub: ““Azadlıq” bloku kifayət qədər uğurlu formul olduğundan fəaliyyətimizi də məhz bu blok çərçivəsində davam etdirəcəyik. Amma bu o demək deyil ki, digər qurumların yaranmasına mənfi baxırıq. Təşkilatların birləşməsini alqışlayırıq və gələcəkdə ayrı-ayrı məsələlər üzrə əməkdaşlığımız mümkündür”.
Yeni alyansın yaranması haqda bu gün imzalanması nəzərdə tutulan sazişin təxirə salınması ilə bağlı APA-ya məlumat verən Azərbaycan Demokrat Partiyasının (ADP) Qurultaya Hazırlıq üzrə Təşkilat Komitəsinin sədri Sərdar Cəlaloğlu isə bildirib ki, bu “Azadlıq” bloku ilə bağlı olub. Blokun qərarını gözlədiklərini deyən S. Cəlaloğlu buna görə də sazişin növbəti günlərdə imzalanacağını deyib. “Azadlıq”ın cavabına gəldikdə, S. Cəlaloğlu bunu şəxsi maraqlarla izah edib: “Bu qərar göstərir ki, siyasi qüvvələr arasında münasibətlər o qədər fərdiləşdirilib ki, hər kəs öz şəxsi iddialarından çıxış edir, ümumi maraqlar heç kimi maraqlandırmır. Onların şəxsi maraqları milli maraqlardan ya fərqli, ya da üstündür. Xarici ölkələrdə bəzən hətta silahlı müxalifətlə demokratik müxalifət milli məsələlərdə bir araya gəlir. Amma Azərbaycanda o qədər fərdiləşmə gedib ki, adamlar hətta milli məsələlərdə belə bir araya gəlmək istəmirlər. Situasiya o qədər qənaətbəxş olmasa da, təşəbbüs inkişaf etdiriləcək”. S. Cəlaloğlunun sözlərinə görə, bu gün Müsavat Partiyasının qərargahında İsa Qəmbər, Azərbaycan Naminə Milli Forumun prezidenti Eldar Namazov, Tərəqqi Partiyasının sədri Çingiz Dəmiroğlu, AMİP lideri Etibar Məmmədovun təmsilçisi və onun iştirakı ilə toplantı keçirilib. Toplantıya Azərbaycan Sosial Demokrat Partiyasının həmsədri Araz Əlizadə də qatılıb. Açıq Cəmiyyət Partiyasının sədri Akif Şahbazov isə üzürlü səbəbdən bu görüşdə iştirak edə bilməyib. Toplantıda alyansın yaradılması ilə bağlı müzakirələr davam etdirilib: “Hazırda görüşlərdə iştirak edən qüvvələr bir-birini qəbul edir və düşünürük ki, alyansı yaratmaq mümkün olacaq. Tərkibi çox da genişləndirmək fikrində deyilik. Amma müxalifətin həm sağ, həm sol, həm də mərkəzçi qüvvələri alyansda təmsil olunsa, yaxşı olar”. /APA/