Daxili siyasət

Ana səhifə

Daxili siyasət

Bakıda “Korrupsiyaya qarşı mübarizə və keçid dövrü ölkələrində islahatlar” mövzusunda konfrans keçirilir

31 may 2007 09:41 (UTC +04:00)

APA-nın məlumatına görə, tədbirdən əvvəl “Transparency İnternational” təşkilatının sədri Huggete Labelli, qurumun Avropa və Mərkəzi Asiya üzrə Regional Mərkəzinin direktoru Mikeloş Marşal və təşkilatın Azərbaycan üzrə icraçı direktoru Rəna Səfərəliyeva mətbuat konfransı keçiriblər. M. Marşal bugünkü tədbirin keçirilməsində əsas məqsədin Azərbaycanda korrupsiyaya qarşı mübarizə sahəsində görülən işlərə dəstək vermək olduğunu bildirib. O, Azərbaycanda iqtisadiyyatın inkişafı üçün böyük zəmin olduğunu qeyd edərək deyib ki, “Transparency İnternational” təşkilatı korrupsiyaya qarşı mübarizə sahəsində Azərbaycan hakimiyyətinin addımlarını dəstəkləməyə hazırdır. Xanım Labelle isə korrupsiyaya qarşı mübarizə tədbirlərini həyata keçirmək üçün həm də siyasi iradəyə ehtiyac olduğunu vurğulayıb.
Daha sonra bir sıra beynəlxalq təşkilatların nümayəndələri, həmçinin, Azərbaycanın dövlət və hökumət rəsmiləri, diplomatik korpus təmsilçilərinin iştirakı ilə konfrans başlanıb. Konfransda çıxış edən Prezidentin İcra Aparatının rəhbəri, Korrupsiyaya Qarşı Mübarizə üzrə Dövlət Komissiyasının rəhbəri Ramiz Mehdiyev prezident İlham Əliyevin tədbir iştirakçılarına məktubunu oxuyub. Azərbaycanda korrupsiya ilə mübarizə sahəsində həyata keçirilən tədbirlərdən danışan R. Mehdiyev korrupsiyanın bütün dünya ictimaiyyətini narahat edən problem olduğunu, korrupsiya ilə mübarizə sahəsində Azərbaycanda möhkəm qanunvericilik bazasının yaradıldığını, "Şəffaflığın artırılması və korrupsiyaya qarşı mübarizə sahəsində Milli Strategiya (2007-2010)" hazırlandığını diqqətə çatdırıb. O, Ermənistanın işğalçılıq siyasəti barədə konfrans iştirakçılarına məlumat verib.
“Transparency İnternational”ın sədri, xanım Hugette Labelle çıxışında korrupsiyanın milyonlarla insanın həyatına təsir göstərdiyini qeyd edib: “Biz hər il hesabatlar hazırlayır, orada korrupsiyanın daha çox hansı sahələrdə mövcud olduğunu göstəririk. Bu problem daha çox keçid dövrünü yaşayan ölkələrdə qeydə alınır”. H. Labelle təşkilatın Azərbaycandakı nümayəndələrinin hökumətə qeyd edilən problemlə mübarizədə köməklik göstərməyə hazır olduğunu da vurğulayıb.
Baş prokuror Zakir Qaralov da çıxışında Azərbaycan hakimiyyətinin, hüquq-mühafizə orqanlarının bu günə qədər korrupsiya ilə bağlı gördüyü tədbirləri haqda danışıb. Z. Qaralov buna misal olaraq sabiq səhiyyə naziri Əli İnsanovun rəhbərliyi altında səhiyyə sahəsində həyata keçirilən korrupsiya hallarının aşkarlanaraq aradan qaldırıldığını, cinayətkarların cəzalandırıldığını bildirib. O, hazırda sabiq iqtisadi inkişaf naziri Fərhad Əliyev və təqsirləndirilən digər şəxslərin məhkəmə prosesinin başlandığını qeyd edərək, onların da korrupsiya əməllərinə görə ittiham edildiklərini tədbir iştirakçılarının nəzərinə çatdırıb. Baş prokuror bildirib ki, Ədliyyə Nazirliyi Pentensiar Xidmətində aşkar edilən korrupsiya əməlləri ilə bağlı da konkret tədbirlər görülüb. Z. Qaralov ölkədəki qeyri-hökumət təşkilatları, o cümlədən, “Transparency İnternational” təşkilatı ilə sıx əməkdaşlıq əlaqələrinin mövcud olduğunu, korrupsiyaya qarşı mübarizə sahəsində beynəlxalq təcrübənin, o cümlədən digər dövlətlərin formalaşmış normativ bazasının öyrənildiyini vurğulayıb. Baş prokuror Azərbaycanın dövlət təsisatları tərəfindən korrupsiyaya qarşı aparılan barışmaz mübarizənin daha da gücləndirilməsinin təmin olunacağını deyib.
Prezident Aparatının Hüquq-mühafizə orqanları ilə iş şöbəsinin müdiri Fuad Ələsgərov da çıxışında bildirib ki, korrupsiyaya qarşı mübarizə Azərbaycan hakimiyyətinin daim diqqətindədir. O, bu yöndə müvafiq qanunvericilik bazasının yaradıldığını, korrupsiya ilə əldə edilən çirkli pulların yuyulmasında iştirakçı olan şəxslərin cəzalandırılması məqsədilə qanunvericiliyə dəyişikliklər edildiyini bildirib. Azərbaycanın korrupsiya ilə qarşı mübarizə tədbirləri çərçivəsində beynəlxalq təşəbbüslərə qoşulduğunu bildirən PA rəsmisi beynəlxalq qurumlar tərəfindən Azərbaycana edilən tövsiyələrin icra edilməkdə olduğunu da qeyd edib. F. Ələsgərov 2007-2010-cu illər üzrə “Şəffaflığın artırılması və korrupsiyaya qarşı mübarizə sahəsində Milli Strategiya” layihəsinin artıq hazır olduğunu söyləyib. Bununla bağlı dinləmələrin keçirildiyini bildirən şöbə müdirinin sözlərinə görə, beynəlxalq və yerli ekspertlərin iştirakı ilə hazırlanan strategiya layihəsi uzunmüddətli istiqamətləri müəyyən edən konsepsiya sənədindən və konkret tədbirlər planından ibarətdir.
Daha sonra tədbir işini ekspertlərin, beynəlxalq mütəxəssislərin çıxışları ilə davam etdirib. /APA/