Daxili siyasət

Ana səhifə

Daxili siyasət

YAP Rusiya Dövlət Dumasının üzvünün Dağlıq Qarabağda keçirilən “prezident seçkiləri”nə müşahidə qismində qatılmasına etiraz edib

19 iyul 2007 15:19 (UTC +04:00)

Yeni Azərbaycan Partiyası (YAP) Rusiya Dövlət Dumasının nümayəndəsinin qondarma “Dağlıq Qarabağ Respublikası”nda keçirilən “prezident seçkisini” “beynəlxalq müşahidəçi” statusunda izləməsi ilə əlaqədar bu ölkənin Azərbaycandakı fövqəladə və səlahiyyətli səfiri Vasili İstratova etiraz məktubu göndərib. Partiyanın mətbuat xidmətindən APA-ya daxil olan məlumata görə, məktubda Ermənistan tərəfindən işğal olunmuş Dağlıq Qarabağda keçirilən “prezident seçkisi”nin dünyanın aparıcı beynəlxalq təşkilatları BMT, Avropa Şurası, ATƏT, Avropa Birliyi, İslam Konfransı Təşkilatı tərəfindən pislənildiyi qeyd olunub. Həmçinin bu “seçkinin” beynəlxalq təşkilatlar və dünya ictimaiyyəti tərəfindən beynəlxalq hüquq normalarına kobud etinasızlıq və münaqişənin sülh yolu ilə həlli əleyhinə yönəlmiş addım kimi qiymətləndirildiyi məktubda öz əksini tapıb: “Dünyanın heç bir nüfuzlu və özünə hörmət edən beynəlxalq təşkilatı qondarma Dağlıq Qarabağda keçirilən “prezident seçkisi”ni izləmək üçün müşahidəçi göndərməyib. Rusiya Federasiyasının Dövlət Dumasının Təşkilat və Reqlament Komitəsinin sədr müavini Sergey Qlotov, o cümlədən qeyri-hökumət təşkilatları adı altında ayrı-ayrı Rusiya vətəndaşları “beynəlxalq müşahidəçi” statusunda qondarma “Dağlıq Qarabağ Respublikası”nda keçirilən “prezident seçkisi”ni müşahidə edir. Rusiya “müşahidəçilərinin” bu addımı beynəlxalq hüquq və etik normalarla daban-dabana ziddiyyət təşkil edir və onlar bu cür “müşahidəçilik missiyası” ilə əslində özlərini separatçılarla bir cərgədə qoymuş olurlar”. YAP Dövlət Duması nümayəndəsinin bu addımını münaqişənin tənzimlənməsinə vasitəçilik edən ATƏT-in Minsk Qrupunun həmsədr ölkəsi olan Rusiyanın Azərbaycanla strateji əməkdaşlığına zidd mövqe kimi dəyərləndirib. Partiya Rusiyanın müvafiq qurumlardan problemə aydınlıq gətirilməsini xahiş edib. /APA/