Daxili siyasət

Daxili siyasət

Nizami Bəhmənov: “Heç vaxt separatçıların bayrağı altında oturmayacağıq”

21 iyul 2007 13:57 (UTC +04:00)

APA-nın məlumatına görə, görüşdə Azərbaycan Milli Məclisinin Dağlıq Qarabağdan seçilmiş üzvü Elman Məmmədov və icma üzvləri də iştirak ediblər. N. Bəhmənov Dağlıq Qarabağ separatçılarının iyulun 19-da keçirdikləri “prezident seçkisi” ilə bağlı Aİ-nin bəyanatına görə təşəkkürünü bildirib: “İstər Avropa İttifaqının, istərsə də digər beynəlxalq təşkilatların bu üzdəniraq seçkilərlə bağlı bəyanatlarında indiyə qədər səslənməmiş ifadələr var. Ancaq təəssüf edirik ki, bu bəyanatlarda Ermənistanın işğalçı olduğu göstərilmir”. P. Semnebinin sentyabrda Dağlıq Qarabağa gözlənilən səfərinə toxunan N. Bəhmənov ona Azərbaycanın işğal olunmuş ərazilərinə işğal olunmamış ərazilərindən keçərək getməyi təklif edib: “Bu yaxınlarda Azərbaycan və Ermənistan ziyalılarının qarşılıqlı səfərləri bu yolun təhlükəli olmadığını göstərdi”.
Öz növbəsində, Aİ-nin Dağlıq Qarabağ separatçılarının keçirdiyi “prezident seçkisi”ni tanımadığını bir daha vurğulayan P. Semnebi təmsil etdiyi qurumun ATƏT-in Minsk Qrupunun fəaliyyətini dəstəklədiyini bildirib. O, Dağlıq Qarabağa bu ilin iyununa planlaşdırılan səfərinin obyektiv səbəblərdən təxirə salındığını deyib: “Mən orada real vəziyyəti öyrənmək üçün özüm küçələrdən keçmək istəyirəm. Ziyalıların səfəri çox gözəl faktdır və davam etdirilməlidir”. P. Semnebinin Dağlıq Qarabağın azərbaycanlı və erməni icmalarının görüşü ilə bağlı sualına cavab olaraq N. Bəhmənov heç vaxt separatçıların bayrağı altında oturmayacaqlarını bəyan edib: “Dinc əhali ilə görüşməkdə heç bir problemimiz yoxdur. Bu görüş hər hansı erməninin və ya azərbaycanlının Şuşada dağıdılmış evində də keçirilə bilər”. /APA/