Daxili siyasət

Daxili siyasət

BQP bu ilin payızından prezident seçkilərinə hazırlıqlara başlayacaq

25 iyul 2007 13:54 (UTC +04:00)

Böyük Quruluş Partiyası (BQP) bu ilin payızından 2008-ci ildə keçiriləcək prezident seçkilərinə hazırlıqlara başlayacaq. Partiyanın sədri Fazil Qəzənfəroğlu APA-ya bildirib ki, BQP-nin qurultayı prezident seçkilərində öz namizədi ilə iştirak etmək barədə qərar qəbul edib. Buna görə də o, partiyasının bu seçkilərə qatılacağını bildirib: “Biz bu seçkilərdə çox fərqli kampaniya aparmağı düşünürük. Çünki bizim böyük insan qüvvəmiz yoxdur. Buna görə də yalnız fərqli kampaniya aparmaqla dəstək qazanmağı qarşımıza məqsəd qoymuşuq”. Həyata keçiriləcək kampaniyanın forması barədə əvvəlcədən danışmaq istəməyən F. Qəzənfəroğlu ənənəvi taktikalardan istifadə olunmayacağını da qeyd edib: “Azərbaycanda prezidentliyə namizəd olan şəxs öz ətrafında blok formalaşdırmağa çalışır. Amma biz belə bir birliyin yaranması üçün hər hansı danışıqlar aparmaq fikrində deyilik. Çünki blok yaranan zaman namizəd istər-istəməz həmin blokda olanlardan asılı olur. Biz belə asılılıq şəraitində seçkilərə getmək istəmirik”. F. Qəzənfəroğlu payızda rayon təşkilatlarında toplantıların keçiriləcəyini, atılacaq addımların müəyyənləşəcəyini bildirib. O, seçkiləri müşahidə məsələsində xüsusi fəallıq göstərəcəklərini vurğulayıb. /APA/