Daxili siyasət

Daxili siyasət

Böyük Quruluş Partiyası Dövlət Əmlakının İdarə Edilməsi üzrə Dövlət Komitəsi ilə bağlı məhkəməyə müraciət edəcək

25 iyul 2007 13:54 (UTC +04:00)

Böyük Quruluş Partiyası (BQP) Dövlət Əmlakının İdarə Edilməsi üzrə Dövlət Komitəsi (DƏİEDK) ilə bağlı məhkəməyə müraciət edəcək. Partiyanın sədri, millət vəkili Fazil Qəzənfəroğlunun APA-ya verdiyi məlumata görə, BQP-nin dövlət qeydiyyatına alınmasından iki ilə qədər vaxt keçməsinə baxmayaraq, bu müddətdə komitə onları qərargahla təmin etməyib. F. Qəzənfəroğlu məsələ ilə bağlı dəfələrlə dövlət komitəsinə rəsmi müraciət etdiklərini bildirib: “Amma hər dəfə onlar bizə başdansovdu cavab veriblər. Göstərdikləri yerlərdə isə normal fəaliyyət göstərmək üçün minimum şərait belə yoxdur”. Partiya sədri hazırda iddia ərizəsinin hazırlandığını və qısa müddətdə məhkəməyə müraciət olunacağını bildirib.
DƏİEDK-nin mətbuat xidmətinin rəhbəri Qulu Xəlilov isə APA-ya açıqlamasında dövlət qurumuna qarşı səslənən ittihamların doğru olmadığını bildirib. Onun sözlərinə görə, komitənin əsasnaməsinə görə qurum yalnız dövlət qurumlarının yerlə təmin olunması tədbirlərini həyata keçirir: “Amma bununla bərabər digər ictimai təşkilatların da icarə müqaviləsi əsasında yerləşdirilməsi komitənin səlahiyyətindədir. Biz BQP-yə bu vaxta kimi bir neçə yer təklif etmişik. Amma onlar həmin yerləri bəyənməyiblər və tam şəraitli yer istəyiblər”. /APA/